PCB inissianiittoq ajoqutaasinnaavoq
PCB timip illersorsinnaaneranik kinguaassiorsinnaanermillu millisitsisarpoq, taama oqaluttuarpoq nakorsaq Flemming Kleist Stenz. PCB navianaranilu navianarpoq, ima paasillugu, erniinnaq ajoqutaalersinnaasunik akoqannginnami. Kisiannili tassa timimi katersuuttarpoq sivisuumillu sunniuteqarsinnaalluni. Kingunerisinnaasai tassaasinnaapput timip illersuutaanut kinguaassiorsinnaanermullu sunniutigisinnaasai.
PCB 1950-ikkunni 60-ikkuni 70-ikkunnilu illulliornermut atussallugu nuannarineqarsimavoq. Ukiunilu taakkunani illuliat amerlanerpaat sananeqarsimapput. Tassa imaappoq, inuit amerlaqisut illuni PCB-qartuni ukiuni 50-60-ini najugaqareersimapput.
-PCB-mut attuumassuteqarunik piffissami sivisuumi, taava annilaanngatigineqarsinnaavoq piffissap sivisuup ingerlanerani sunniuteqalersimassasoq.
-Taamaattorli nakorsaanerup annilaanngatissaqannginnerarpaa, tamatumunnga peqatigitillugu ajornartorsiutip qanoq annertutiginerata piaartumik misissorneqarnissaa pisariaqartillugu.
-Oqareernittut piaartumik ajoqutaalersinnaanera ernummatissaanngilaq, inuillu illuniit anisittariaqanngillat PCB-qarnera pissutigiinnarlugu. Matumanili pineqarpoq qanoq annertutiginera piaartumik uuttortarlugu paasissallugulu, naatsorsukkallu inerneri tamakkuninnga suliaqartartunut misissortillugit aaqqiivigitillugillu.
-Ajornartorsiutit tamakkua sukkanerpaamik qanoq iliorluta aaqqissinnaavavut?
-Apeqqutaalluinnarpoq qanoq annertutigisumik atorneqarsimanersut, tamakkua uuttortarneqartariaqarput maannakkorpiarlu suliarineqartariaqarlutik.
Avatangiisinut Pinngortitamullu qullersaqarfiup ullumikkut suliassaq oqaaseqarfigiumanngilaat oqarlutilli, ajornartorsiutip qanoq annertutiginera misissulerlugu iliuusissatullu pilersaarusiorlutik.
