Paul Watson Nuummi pineqaatissinneqarsimasunut inissiisarfimmiiginnassasoq

Paul Watsonip aniguilluni Nuuk suli qimaqqusaanngikkallaqqippaa. Nunatsinni Eqqartuussiveqarfiup tamanna aalajangerpaa.

Allattoq Hanna Vestergaard Hviid

novembarip 13-at 2024 10:03

Arferit pillugit suliniuteqartup, 73-inik ukiullip, Paul Watsonip tigummigallarneqaannarnissaanut Nunatsinni Eqqartuussiveqarfik ullumi aalajangeeqqippoq.

Taanna suli ulluni 21-ni Nuummi pinerluuteqarsimasunut inissiisarfimmeeqqissaaq. Taamaammat tassunga tunngatillugu suliaq decembarip aappaani eqqartuussivimmi suliarineqaqqissaaq.

Paul Watson Nuummi maanna ulluni 114-ini tigummigallarneqareerpoq.

PAUL WATSON NAATSUMIK

Canadami Torontomi 1950-imi decembarip aappaani inunngorpoq.
Avatangiisinik illersuiniaqatigiiffimmik Greenpeacemik 197-imi pilersitseqataasuuvoq. Tassanngali 1977-imi anivoq.
Immap uumasuinik immamilu uumassusillit ataqatigiiaarnerannik illersuiniaqatigiiffimmik Sea Shepherd Conservation Societymik tamatuma kingorna 1977-imi pilersitseqataavoq.
Sea Shepherds pillugit piviusulersaarusiami nangeqattaartumi "Whale Wars"-imi pingaarnertut inuttaasunut ilaavoq.
"Avatangiisinik 1900-kkunni illersuiniallammaat 20-t ilaattut" amerikamiut atuagassiaasa ilaannit Time Magazinemit 2000-mi toqqagaavoq.
Atuakkiai ilaatigut makkuupput: "Ocean Warrior" aamma "Earthforce!", imalu oqaasinnaaqarnini aamma ilisimaneqaatigaa: “If the oceans die, we die” (imarpiit uumassuseeruppata, uagut toqussagut, (aaqq.))

Watson Nuummut umiarsuarminik 26-nik inuttaqartumik juulimi orseriartornerminni tigusarineqarpoq.

Japanimi oqartussat Japanimiunut arfannianut ukiut 14-it matuma siornatigut illersuiniarnikkut akornusiisoqarsimanera pillugu tigusarineqarnissaanut peqqussuteqarnikuupput. Watson taamaammat Japanimut tunniunneqassanersoq pillugu Danmarkimi Inatsiseqarnermut ministereqarfiup aalajangiinissaata tungaanut tigummigallarneqarpoq.

Watsonip illersuisuata, Finn Meinelip aalajangiineq Nunatta Eqqartuussisuuneqarfianut erngertumik suliarineqaqqitassanngortippaa. Taanna eqqartuussisoqarnerit tamaasa taamaaliortarpoq.

Juullimut angerlassanngitsoq

Paul Watsonip tigummigallarneqarnermi sivitsorneqaqattaarnera meeqqaminut sunniuteqartussaanera juullimullu angerlarsinnaannginnini eqqartuussivimmi kamaatigaa.

Aamma atuarukFrankrigemut qimaasutut inissinnissaminut Paul Watson qinnuteqarpoq

Eqqartuussisulli Inatsiseqarnermut ministereqarfimmit aalajangiisoqangajalernissaa naatsorsuutigalugu oqaatigaa. Tamatuma saniatigut Danmarkimi Eqqartuussiviit qullersaanit suliap misissuiffigineqarnissaa aamma utaqqivaat, Paul Watsonimmi illersuisuata suliap tassani suliarineqartitsiniarnera akuerineqarnikuuvoq.

Finn Meinelimmi tigummigallaaginnarnissamut tunngavissaqarsorinngilaa, Watsonilli Inatsiseqarnermut minsitereqarfiup aalajangiinissaata tungaanut Nuummiiginnarnissaa eqqartuussiviup aalajangerpaa.

Nutaarsiassami kukkunermik nassaarsimaguit uunga allaffigineqarsinnaavugut.