Paul Okalik nalliuttorsiornermut peqataavoq
Partii Siumut 30-iliisinneqarluni Qaqortup Timersortarfiani ippassaq unnukkut nerersuaqatigiittoqarneratigut nalliuttorsiutigineqarpoq.
Inuit 320-t missaanniittut peqataapput, Nunavumilu naalakkersuisut siulittaasuat Paul Okalik naalakkersuisunik allanik ilaqarluni nalliuttorsiornermut peqataavoq.
Sermitsiaq nittartakkamini taama allappoq.
Nunatsinnut angalanermini kingumut isumassarsilluarsimalluni Paul Okalik-up oqalugiarnermini oqaatigaa.
Nunatsinnut tikeraat savaateqarfinnut arlalinnut angalaalinnginnerminni Annaassisitta Oqaluffiani naalagiaqataapput, Qaqortumilu Napparsivik-mi unnummut nereqatigiinnissamut naalakkersuisut siulittaasuannit Hans Enoksenimit qaaqqusaasimallutik.
Naalakkersuisut siulittaasuisa akornanni aqagu ataatsimeeqatigiittoqassaaq.