Patti Smith nobelip nersornaataanik agguaassinermi erinarsorluni unittoorpoq
Nobelip nersornaasiuttagaanik ukiut tamaasa Sverigemi Stocholmimi agguaassisoqaraangat qaqutigoortuuvoq nersornaaserneqartussat nersornaatisiatik aallalugit takkunneq ajortunik.
Aamma siornatigut pisimanngisaannarpoq nobelip atuakkiartunut nersornaasiutagaa rockimik nipilersortartumut tuniunneqarmat.
Taamaattumik Stockholmemi nersornaatinik ukiormanna agguaassisoqarmat immikkut illuinnartuuvoq, atuakkiortunut nersornaasiuttagaq Bob Dylanimut ukiormanna tunniunneqarmat inuttaa najuutinngikaluartoq nersorniarlugu oqalugiartoqarpoq nikuillunilu ersaattaanneqarluni.
Bob Dylan sinnerlugu nersornaammik tigusivoq, Bob Dylanip ukiorpassuarni ikinngutaa erinarsortartoq Patti Smith, taanna nersornaammik tunniussinermi erinarsornarpaa, Bob Dylanip erinarsuusiaa " A Hard Rain´s a Gonna Fall"
Patti Smith erinarsortilluni taallap ilaa puigorsimallugu unittoorpoq aallaqqaataaniillu aallarteqqilluni, taamaalilluni unnummi tassani erinarsornera aamma immikkut eqqaamaniarneqassaaq.
Patti Smith erinarsortilluni taallap ilaani puigugaqarnerata saniatigut nobelip nersornaasiuttagaanik agguaassineq periuserineqartut naaperlugit ingerlanneqarput, nersornaaserneqartut sinneri qulingiluat nersorneqarnertik pillugu kunngi Carl Gustafimut qujassuteqarput.
Nobelip nersornaasiuttagaanik nersornaaserneqartut seks million danskit koruuninik tunineqartarput, Stocholmemut qaaqquneqartarlutik piffissallu ilaani kingusinnerusukkut suliatik pillugit saqqummiinissaannik piumaffigineqartarput.
Bob Dylan maanna 75-nik ukioqartoq, saqqummiinissaanik piumaffigineqarnini akuerissaneraa suli ilisimaneqanngilaq.