Pasilliinerit uppernarsaatitaqanngitsut nittartakkami nutaami atorneqarput

- Allaaserisat ilaat pasilliutaaginnarput iluamik uppernarsaatissaqanngitsut. Taamaammat isumaqarpunga neriorsuutini eqquutsinngikkaa, Tusagassiornermik Institutimi pisortaq Naja Paulsen oqarpoq.

Paasisat 400-t itisilerillunilu paasiniaanerit Lars Bo Bjørknæsip toqqortaatiginerarpai, nittartagarlu Aviisi.gl aqqutigalugu saqqummiutissamaarlugit. Takussutissat tamakku Naja Paulsenip takorusukkaluarpai:

- Oqaluttuanik pingaarutilinnik saqqummiussigaangatta pasilliutitut nalilerneqannginnissaat tusagassiortutut pingaartipparput uppernarsaatissaqarnissaat pingaartittarlutigu. Ileqqorissaarnissaq pingaaruteqarpoq, Naja Paulsen oqarpoq.

Atassutip siulittaasuata Gerhardt Petersenip imigassartorsimatilluni biilersimaneranik Aviisi.gl takussutissaqarnerarpoq, Aviisi.gl-ikkulli uppernarsaatissaqanngimmat, Naja Paulsenip ippigaa.

Nittartakkami allaaserisat qallunaatuinnaq saqqummiunneqarnerat taassuma aamma apeqquserpaa, kalaallisut allaaserinnittoqarsimannginnera ippigalugu.

Lars Bo Bjørknæsip Aviisi.gl-ikkut saqqummiussai arlaannaannulluunniit attuumassuteqanngitsutut oqaatigineqarsinnaappat namminerluunniit isummaminik saqqummiussinerua?

- Allaaserisat assigiinngitsut taama kamassaqartigalunilu saassutaarinerunerat tupinnarpoq. Oqaluttuatsialak soorunami oqaluttuatsialaavoq, kisianni uppernarsaatissaqartariaqarpoq. Aamma apererusunnarpoq taamaaliornermi nammineq inuttut tunuliaqutaa suunersoq. Allaaserisammi kamaqarpaseqimmata, Naja Paulsen oqarpoq.