Qummoroortaatit sianigalugit
Isarussat illersuutit atorneqartariaqarput qummoroortaatillu illup qanitaani sapinngisamik aallartinnaveersaarneqassallutik. Kommune Qeqertalimmi ukiortaami upalungaarsimanissamut pisortanngortussaq, David Løvstrøm, KNR-imut taama oqarpoq.
- Isarussat isinut illersuutit namminerluunniit qummoroortanngikkaluarluni atoraanni pitsaanerpaajussaaq. Igalaat matoqqatinnissaat eqqaamaniaqquserparput. Qummoroortaat arlaatigut uppilluni, illullunniit tungaanut aallarluni, qaariataassagaluarpat, makku innaalunnerisa igalaap ikersisimarngatigut ilummut appakaakkuni saagunik ikuallatsitsisinnaanerat pinaveersaartinniarlugu,
Nunatsinni ukiutoqqami ukiortaamilu marloriarluta qummoroortaatinik aallartitsisarpugut, heksehylillu aamma mianersuuttariaqartut, David Løvtrøm oqarpoq.
- Miloriunneqarsimagunik, jakkip kraviatigut pulasuussagunik uutitsillutilluunniit, atisanut ikuallatsitsinngikkunik nutsanik ikuallatsitsisinnaagamik. Taamaattumik qummoroortaatinik ikissimasunik inunnut, uumasunut illulluunniit tungaannut miloriussuinnginnissaq aamma inassuteqaatigisarparput.
Qummoroortartornerullu nalaani uumasut aamma mianersuuttariaqartut, David Løvstrøm aamma kaammattuuteqarpoq.
- Taava aamma uumasuutit, pingaartumik avannaani qimmit qimuttut eqqarsaatigalugit, qummoroortaatinut qanippallaartillugu tamakkununnga qummoroortarnaveersaarnissaq inassuteqaatitta ilagisarpaat.
Ukiortaamilu sapinngisamik silatusaartumik qummoroortartornissaq David Løvstrømip kaammattuutigaa
- Qummoroortatit kusanartorsuupput. Innuttaasut ajoquserfiunngitsumik qummoroortassappata, inassuteqarfigerusuppagut qummoroortassagaanni imigassamik sunnertissimavallaannginnissaq.
Avannaanilu qatserisartoqarfimmiit innuttaasut sillimanissamut siunnersuutit tusarluassagaat neriuutigineqarpoq minnerunngitsumillu ukiortaamut iserluarnissaannut.
- Taava piffissaq manna iluatsillugu Qaasuitsup Kommuniata qatserisartoqarfia upalungaarsimasut sinnerlugit Kalaallit Nunaanni innuttaasut tamaasa ukiortaamut iserluarnissaannik kissaallugit pilluaqquniarpakka, Kommune Qeqertalimmi ukiortaami upalungaarsimanissamut pisortanngortussaq David Løvstrøm taama oqarpoq.
Ikuallattoortoqassagaluarpat qatserisartoqarfik oqarasuaatikkut 1-1-3-kkut attavigineqarsinnaavoq.
