Naak partiit akornanni ilaanni isumaqatigiinngitsoqartorujussuusaraluartoq, IA-p Naleqqallu Folketingimi ilaasortaatitaqalerunik suleqatigiinnissaq pingaartippaat. Taama oqarput partiit siulittaasui Múte B. Egede (IA) aamma Pele Broberg (N).

Naaja H. Nathanielsen (IA) aamma Qarsoq Høegh-Dam (N) folketingimut marlunngornermi qinigaapput.

- Nunatsinni politikki assigiinngiffeqarsinnaavoq, nunatta avataaniileraangatta Kalaallit Nunaat ataasiuvoq, tamatta illersugaraarput, Pele Borberg oqarpoq nangillunilu:

-Taamaammat aamma uagut Inuit Ataqatigiinnut assammik isaassinikuuvugut aamma ilaasortanngortitaqariarmata, nunatta tunngaviusumik ataatsimoorfigisinnaasaata ataqatigiissarnissaat qulakkeerniarlugu, naak qinikkat namminiussuseqaraluaqisut. 

IA aamma Naleraq kalaallit Folketingimi ilaasortaaffii marluusut, Aaja Chemnitzimik (IA) aamma Aki-Matilda Høegh-Damimik (N), qinigaaffimmi kingullermi ilaasortaatitaqarfigaat.

Aki-Matilda Høegh-Dam Siumut sinnerlugu Folketingimut 2022-mi qinersinermi qinigaavoq, Naleqqamulli siorna ilaasortanngorpoq.

Folketingimi ilaasortaasimasut taakkua marluk suleqatigiilluarpallaarsimannginnerat naluneqanngilaq, soorlu aamma partiit taakkua marluk politikkikkut imminnut ungasittut. 

- Nunatsinni inatsisartuni illuatungeriikkaluaruttaluunniit, massakkut danskit inatsisartuini aamma sulisussaavugut, tassanilu aamma suleqatigiiffiusinnaasut assigiinngitsut qularinngilara, Muté B. Egede oqarpoq.

Namminersornermut Inatsit malinneqassasoq

Danmarkip naalakkersuisussai nutaat isumaqatigiinniutigineqarput. Ministeriunerugallartoq Mette Frederiksen siullertut isumaqatiginninniarnernut aqutsisussatut toqqarneqarpoq.

Atlantikup avannaata sinniisaat sapaatip-akunnerata tulliani ataatsimeeqatiginissaannut qaaqquai. Socialdemokratiet tusagassiuutinut sisamanngornermi taama nalunaaruteqarput.

Pele Brobergili aperigaanni, danskit naalakkersuisussaannik isumaqatiginninniarnermi pingaarutilimmik inissisimaffeqalerumaarnerat naatsorsuutiginngilaa.

Nalerarli Folketingimi sulissutiginiakkatik piareersimaffigaat.

- Akisussaaffiit nunatsinnut tunngasut ukiorpassuarni kivinneqarnikuunngitsut kivinneqarnissaat qulakkiissavarput. 

- Assersuutigalugu anstaltinut tunngatillugu oqaluttarput aserfallatsaaliugassaasut, taava ilaatigut oquk immaqa piilaariarlugu qalipalaariarlugu tassa aserfallatsaalivorooq, uffa tamaat peeriarlugu ingutseriarlugulu nutaamik immaqa sanasoqartussaq. 

- Tamakkua sipaarfigineqarnata qulakkeerneqarnissaat, akisussaaffiulli kivinneqarnissaa piumallugu tappavunnassaagut. Taamaammat piumasaqaatit massakkut taasinnaasanni immaqa tassaanerussapput Namminersornermut inatsisip Danmarkimut pisussaaffiliisup malinneqarnissaata qulakkeerneqarnissaa. 

Namminersornerulernissaq

IA-mi tamanna aamma atuuppoq. Inuit atugaasa pitsanngorsarnissaannut aqqutit tamaasa atorlugit ujartuinissaq, taakkununnga pingaaruteqartorujussuuvoq, Múte B. Egede oqarpoq.

Taamatuttaaq kalaallit danskillu politikerit akornanni naligiinnerunissaq piumasaqaatigissavaat. 

- Nunatta namminiussuseqaraluttuinnarnissaa, pingaartumik nunani allani politikkimi, taanna ersarissorujussuarmik piumasaqaatissatta ilagivaat. Naligiimmik ingerlasariaqarpugut normu 2-qarani, normu 1-usariaqaratta tamatta, Múte B. Egede, oqarpoq. 

Naaja H. Nathanielsen aamma Qarsoq Høegh-Dam, Folketingimut qinigaapput. Assi © : Oscar Scott Carl/Ritzau Scanpix

Taamatuttaaq nunatta Danmarkillu akornanni suleqatigiinnerup ingerlarnga allanngortariaqartoq, partiit taakkua marluk kissaatigaat. 

Naaja H. Nathanielsenip namminersorneq pillugu inatsit, tunngaviusumillu inatsisip allanngortinneqarnissaat suliniutiginiarlugit qineqqusaarpoq. 

Naleqqap tuaviortumik naalagaaffimmik pilersitsinissaq, taamatuttaaq nunatta namminiilivinnissaa kissaatigaa.

Søsterparti pisariaqartinngikkaat

Kalaallit danskillu partiivisa akornanni suleqatigiinnerit ukiuni amerlasuuni  ileqqorineqaraluartut, Naleraq Folketingimi aaliangersimasumik suleqateqanngilaq. 

- Pisinnaatitaaffiit qulakkeerniarlugit, Danmarkillu Namminersorneq pillugu inatsimmut pisussaaffii qulakkeertinniarlugit qineqqusaarpugut. Tassa isumaqarpoq uagut søsterpartimik taasagaannik pisariaqartitsinngilagut, Danmarkip iluani politikkikkut assigiiffitsinnik ujartuinnginnatta, Pele Broberg, oqarpoq.

IA-p SF – Socialistisk Folkeparti partiitut suleqatigaa.