Qinersinissaq sapaatip akunnerinik pingasunik sioqqullugu Naalakkersuisut aalajangerput partiinut tapiissuteqartoqassasoq, kommuninut qinersisoqarneranut atatillugu nalinginnaasumik pisartutut, aningaasaqarnermullu ataatsimiititaliami ilaasortat amerlanersaat, Siumumit, Atassummit Inuit Ataqatigiinnillu, immikkut aningaasaliiffigineqarnissaq akuersissutigaat, naak aningaasanut 2009-mi inatsisissami ilanngunneqarsimanngikkaluartoq. Demokraatit akuersissummut akerliupput.
Tapiissutit amerlanerpaartaat partiimut Siumumut tunniunneqarput, Siumut 2005-imi nunaqarfinni aqutsisunut qinersisoqarnerani taaguunneqarnerpaammat.