Partiit qineqqusaarutaat nassaariuminaatsut
Qinersisartutut politikkikkut qineqqusaarutinik ujaasiniaruit partiit suliat aalajangersimasut pillugit isumaat paasiniarlugit misissuisariaqarputit. Partiilli qineqqusaarutaat nassaariuminaassinnaapput, ilaallu atuarniarukkit kalaallisut piginnaasaqartariaqarputit.
Atassutip siulittaasua Sivert K Heilmann oqaluttuarpoq qineqqusaarutitik qineqqusaartitaminnut immikkoortortaminnullu kalaallisut oqaasertallit nassiussuussimallugit, qarasaasiatigulli Facebookikkulluunniit nassaassaqanngilaq.
- Qineqqusaarnerup nalaani qinersisartunit danskisut oqaasilinnit attavigineqartarpugut, taamaattumik nassuiaassillattaavugut. Ilisimavarali sanngiinnerusoq nittartakkatigut paasissutissaateqannginnatta. Taanna nassuerutigaara, Sivert K Heilmann oqarpoq.
Partii Naleqqap nittartakkaminut qineqqusaarunni ivertissimavaa, taannali aamma kalaallisut oqaasilinnuinnaq saaffiginnippoq.
Vittus Qujaukitsoq sisamanngornermi KNR-imut nalunaarpoq Nunatta Qitornaasa qineqqusaarutaat nittartakkamut ilineqangajalersut.
Suleqatigiissitsisut Partiiata qineqqusaarutai danskisuinnaq maannakkut nittartagaanniipput, Michael Rosingili oqarpoq taakku kalaallisut nutserneqartut.
Partiit sinnerisa pingasut qineqqusaarutitik kalaallisut danskisullu nittartakkaminniitippaat.
Partiit ilisarititsissutitut videoliaat ataani isiginnaarneqarsinnaapput:
Partii Naleraq
Nunatta Qitornai
Siumut
Samarbejdspartiet
Demokraterne
Atassut
Inuit Ataqatigiit
