Sisimiuni qinigassanngorteqqusaananilu qinerseqqusaanngitsup Siumumeersup Malik Berthelsenip taasisaasa partiimut tunuliaqutaanut tunniunneqarnerat akueriumanagu partiit illua´tungiliuttut, tassalu Inuit Ataqatigiit, Demokraatit Atassullu naammagittaalliuteqarniarlutik ippassaq unnukkut naapipput, suleqatigiissitamillu allakkiortussamik pilersitsillutik. Allakkiaq naammassineqarpat ualeru atsiorneqassaaq.
Siumumeersup 26-nik ukiullip Malik Berthelsenip qinerseqqusaananilu qinigassanngorteqqusaanngitsup taasisaasa 215-it partiimut tunuliaqutaanut tunniunneqarnissaannik Namminersornerullutik Oqartussani Qinersinermut Ataatsimiititaliap ullormi qinersivimmi aalajangernera matumani pineqarpoq. Tamannalu partiit illua´tungiliuttut naammaginagu taasisaasa atorunnaarsinneqarnissaat piumasaraat. Atassut sinnerlugu Sisimiuni qinersinermik siulersuisuni ilaasortaatitaq Richard Absalonsen ima tunngavilersuivoq:
- Inuk pineqartoq kommunalbestyrelsemut isissanngitsoq aalajangiiffigineqareerpoq, taasisaalu 215-it nul-inngortinneqarlutik. Taamaattumik nul-inngortitsisoqareermat imaaliallaannaq partiimut tunniussisoqarsinnaanngilaq. Aamma partiimut tunuliaqutamut tunniussisinnaanissamik maleruagassani allassimasoqanngilaq. Richard Absalonsen tunngavilersuivoq.
Sisimiuni kommunalbestyrelsemut Siumumeersut arfineq-marluk iserput amerlanerussuteqalerlutik, partiillu illua´tungiliuttut, tassalu Inuit Ataqatigiit, Demokraatit aamma Atassut tamarmik immikkut marlunnik isertitaqarput. Partiit illua´tungiliuttut amerlanerussuteqalernissartik matumani ujartuinnannginnerlugu ?
- Taanna peqqutaanngilaq, kissaatigiinnarparpulli inatsisiliortut inatsisilioraangata malinneqartarnissaat. Richard Absalonsen oqarpoq.
Malik Berthelsen Siumut sinnerlugu qinigassanngortissimavoq, qaammatinik arfinilinnik kommunemi najugaqartussaatitaaneq naammassisimanagu, tamannalu aatsaat ullormi qinersivimmi paasineqarpoq, inuttaa qinersiartorallartillugu.