Partiit illua´tungiliuttut naammagittaalliuteqarnialerput
Sisimiuni kommunalbestyrelsemut qinerseqqusaananilu qinigassanngorteqqusaanngitsup Siumumeersup 26-nik ukiullip Malik Berthelsenip qinigassanngortillunilu taaguunneqarsimanera Sisimiuni assortuussutaalerpoq. Malik Berthelsenip taasisaasa Namminersornerullutik Oqartussani Qinersinermut Ataatsimiititaliap aalajangerneratigut partiimut tunuliaqutaanut tunniunneqarneri, Sisimiuni partiit allat akueriumanngilaat, taasinerillu atortussaajunnaarsinneqarnissaat sulissutigilerlugu.
Malik Berthelsenip taasisai 215-it matumani pineqarput. Malik Berthelsen qineqqusaareerluni ippassaq taasiartoraluarpoq, kommunemilli ilisimatinneqarluni, qaammatit arfinillit kommunemi najugaqartussaatitaanini naammassisimannginnamiuk qinersisinnaananilu qinigassanngortissinnaanani, naak qinigassanngortittut aqqisa akornanniikkaluarluni. Kommunemi kukkusoqarsimasoq paasineqarmat Namminersornerullutik Oqartussani Qinersinermut Ataatsimiititaliaq aalajangerpoq, Malik Berthelsenip taasisai partiimut tunuliaqutaanut, tassalu Siumumut tunniunneqassasut. Tamannali partiimi illua´tungiliuttut akueriumanagu ilaatigut Sisimiuni qinersinermik siulersuisuni taaseqataaffiginngilaat.
Inuit Ataqatigiit sinnerlugit qinersinermik siulersuisuni ilaasortaq Aanissi Svane Johansen ima tunngavilersuivoq:
- Aallaqqaammulli paaseqqaaratsigu akerliulerpunga aamma akuersaarsinnaanngilluinnarpara pineqartup taasisinnaanngitsutut qineqqusaarsinnaanngitsutullu nalilikkap taaneqarnera atortussaajunnaarteriarlugu taasisai tunuliaqutaanut tunniunneqassappata. Aanissi Svane Johansen oqarpoq.
Qinersinermut Ataatsimiititaliami siulittaasoq Kaj Kleist nassuiaavoq, qinikkat piffissaq sioqqullugu tunuaraangata imaluunnit toqukkut qimagukkaangata parteeqamminnit taarserneqartarnerannut periuseq matumani atorsimallugu.
Sisimiuni qinersineq naammassimmat inernerit imaalerput: Siumut amerlanerussuteqarluni arfineq-marlunnik isertitaqarpoq, partiit Demokraatit, Atassut Inuit Ataqatigiillu katillugit arfinilinnik isertitaqarlutik. Matumani partiit illua´tungiliuttut amerlanerussuteqalernissartik ujartuinnannginnerlugu ?
- Aallaqqaammullu akerliullunga siulersuisuni taaseqataanngilanga, taamaattumik tassunga tunngassuteqanngilaq. Aanissi Svane Johansen tunngavilersuivoq.
Inatsisitigut erseqqissumik tunngavissaqarsimanatik Qinersinermut Ataatsimiititaliap siulittaasuata Kaj Kleistip nassuerutigaa.
- Taama pisoqarsinnaaneranut tunngasunik inatsiseqanngilaq, aammami inatsisit tunngavigalugit taama pisoqarsinnaasussaanngikkaluarmat. Kaj Kleist nassuiaavoq.
Kaj Kleist aamma erseqqissaavoq, qinersinermit ullut arfineq-marluk qaangiutsinnagit siullermik kommunemut naammagittaalliuteqartoqarsinnaasoq, pisariaqarpallu Namminersornerullutik Oqartussanut suliassanngortitsisoqarsinnaasoq.
Sisimiuni partiit illua´tungiliuttut ualeq manna tallimanut ataatsimiipput, pisimasut pillugit naammagittaalliuteqarniarlutik, minnerunngitsumillu Malik Berthelsenip taasisaasa atorunnaarsinneqarnissaat anguniarlugu.
