Partiip nutaap aalisarneq aaqqissuuteqqinniarlugu nunattalu naalagaaffinngornissaa anguniaraa

Nunarput nutaamik parteeqalissaaq.

Partiip Qulleq ateraa, tassanngalu nunatta naalagaaffinngornissaa anguniagaavoq.

Siumumi ilaasortaasimasoq maannalu Qullermi siulittaasoq, Henrik Fleischer tusagassiuutinut nalunaarummi oqarpoq.

Partiip naalagaaffinngortitsiniarnermini akisussaaffiup tamarmi nunatsinnit tiguneqarluni aalisarneq aaqqissuuteqqinniarpaa. Tamanna nunatsinnut inuiaqatigiinnullu aningaasaqarnikkut pitsaanerpaamik iluanaarutaassasoq Henrik Fleischer isumaqarpoq.

Tamatuma saniatigut partiip kalaallit piorsarsimassusaat oqaatsivullu illersorniarpai. Taamaammat pisortat allaffeqarfiini Inatsisartunilu kalaallisut pisortatigoortumik oqaasiussapput.

Henrik Fleischerittaaq kommunit aaqqissuussaanerat allanngortillugu KANUKOKA kommunit kattuffiat atulerseqqinniarpaa. 

Anguniakkat qulit

Henrik Fleischerip siunertat qulit partiip sulissutiginiagai saqqummiuppai. Siunertat tamarmik nunatta naalagaaffinngornissaanut iluaqutaassapput:

1. Nunarput nammineq tunngaviusumik inatsiseqarluni naalagaaffiussaaq. Akisussaaffiit sinneruttut naalagaaffimmit ingerlanneqartut nunatsinnit tiguneqassapput.
2. Kommunitoqqat atulerseqqinneqassapput. KANUKOKA pilerseqqissavarput.
3. Inuiaqatigiit politikkikkut aningaasaqarnikkullu naqisimaneqanngitsut pilersinniarpagut.
4. Nunatta pisuussutai paarilluarneqarlutik innuttaasunut iluanaarutaasumik atorneqassapput.
5. Aalisarneq aalisakkanillu avammut niuerneq aaqqissuunneqaqqissaaq, tamannalu nunatta inuiaqatigiillu aningaasaqarnikkut iluanaarutigissavaat. Imartatsinnut akisussaaffik nunatsinni tiguneqarnissaa suliarineqassaaq.
6. Kalaallisut oqaatsivut inatsisartuni pisortallu sulliviini tamani oqaasiussapput.
7. Inuiaat ersarissumik kinaassuseqartut, aningaasaqarnikkut naligiinnerusumik atugassaqartitsisut pilersinniarpavut.
8. Ilinniarluarsimasut nunaminnut naleqqussarsimasut pilersinniarpavut. Ilinniartitaanit, inuussutissarsiorneq, ineqarneq, isumaginninneq peqqissaaveqarnerlu ineriartortinneqassapput.
9. Tamat oqartussaaqataanerat illersorneqarlunilu ataqqineqassaaq.
10. Qulliup Naalagaaffiit Peqatigiit inuit pisinnaatitaaffii pillugit aalajangersagaat nunatsinni aamma malinneqarnissaat sulissutiginiarpaa.