Partii nutaaq: Inatsisartut oqaluttarfianit kalaallisuinnaq oqaluttoqassaaq

Nunatsinni partiit nutaajunersaat, Partii Inuit, januaarip 24-iani ukiormanna pilersinneqarpoq. Partiimilu qineqqusaaqqaarnissaminnut maanna piareersaleruttorput, partiillu anguniagai akuerineqaqqammerlutik. Partiip pingaartitaasa ilagaat oqaatsinut politikki.

- Inatsisartuni oqaluttarfimmit kalaallisuinnaq oqaluttoqarnissaa piumasaraarput, partiimik pilersitsisoq Nikku Olsen KNR.gl-imut oqarpoq.

Nunatsinni kalaallisut oqalussinnaanngitsut amerlangaluartut ajornartorsiutitaqartussatut isiginngilaa.

- Danmark innuttaasuminut taamatorluinnarpoq piumasaqaateqarpoq. Danmarkimi danskisut oqalunnissaq piumasaqaataavoq. Soormi uagut Nunatsinni kalaallisut oqaatsivut atorneqarnissaat piumasarisinnaanngilarput, Nikku Olsen aperivoq.

Partii Inuit aamma Kalaallit Nunaata Danmarkimit avissaarnissaa siunnersuutiginiarpaa.

- Tamanna soorunami inunnik taasisitsinikkut aalajangerneqassaaq. Uagulli isumaqarpugut Naalagaaffeqatigiinneq maannakkutut isikkoqartillugu killilersuivallaartoq, Nikku Olsen oqarpoq.

- Aningaasatigut siuariartornissamut, ilinniartitaanikkut nunanillu allanik suleqateqarnissamut tunngatillugu aalajangiinissamut kiffaanngissuserput killilersorneqarpoq, Nikku Olsen oqarpoq.

Partiip nutaap qineqqusaartitassani suli saqqummiutinngilai.