Partii Naleraq Sisimiuni immikkoortortaqarfeqalersoq
Partii Naleraq Nunatsinni illoqarfiit anginerit pingajuganni immikkoortortaqarfeqalerpoq. Partii Naleqqap aaqqissugaanik Sisimiuni innuttaasunik ataatsimiititsinerup, nunatta pissarititai pillugit oqalliffiusup, kingorna immikkoortortaqarfik pilersinneqarpoq.
Allattoq Jonas Fievé
Nunatta pissarititai avataaneersunit aningaasatigut iluaqutaaginnaratik aamma nunaqavissunit iluaqatigineqarnissaat ataatsimiinnermi isumaqatigiissutigineqarpoq.
Aammattaaq nunatta namminiilivinnissaa anguniagaassasoq naqissuserneqarpoq, Partii Naleraq tusagassiorfinnut nalunaaruteqarluni taama allappoq.
Siulersuisunngortut tassaapput: Siulittaasoq Henrik Fleischer, siulittaasup tullia Malene Ingemann, aningaaserisoq Tobias Fleischer, allatsi Arnajarak Olsen, siulersuisuni ilaasortaq Ulloriaq Olsen, sinniisussaq Peter Møller.