Partii Naleraq pilersinneqarpoq

Ineqarnermut tapiissuteqartarneq iluarsartuussiffigineqassaaq. Suliffissaaleqineq pimoorussamik suliniuteqarfigineqassaaq. Pisortallu allaffissornerat annikillisarneqassalluni.

Hans Enoksenip Partii Naleraq sinnerlugu politikkikkut anguniakkatut saqqummiussaasa tamakku ilagaat.

Nunaqarfimmiunullu tunngatillugu Naleraq iliuuseqarniarpoq.

- Isorliunerusuni najugallit immikkut aaqqissuussiffigineqarnissaat saneqqunneqarsinnaajunnaarpoq, sanaartornikkut unittooqqaneq inissialiornerillu naapertuunnerusut aallartinneqarnissat Partii Naleqqap anguniassallugu ilungersuutissavaa, pingaartumik Avanersuarmi, Tunumilu, pissutsit aamma  inuit atugaannut tunngasut, ulluinnarnilu ineqarnikkut inuussutissallu akiinik  akilertagaat  eqqarsaatigalugit, nalunaarummi ilaatigut taama allassimasoqarpoq.

Partii Naleraq aamma nunqarfinni meeqqanut paaqqinnitarfinnik pisortallu inissiaataannik nutaanik sanaartortoqarnissaa sulissutiginiarpaa. Aammattaq partii isumaqarpoq nunatsinni akit akilersinnaasat sipporlugit akiliisitsisarneq misissuiffigineqartariaqartoq.

Partii Naleraq 'nunatsinni innuttaasunik akissaatikinnerusunik illersuisutut' imminut taavoq, aalisartullu, piniartut, sulisartut, savaatillit namminersorlutillu suliffeqarfiutillit pitsaanerusunik atugaqalernissaat sulissutiginiarpaa. 

Tamatuma malitsigisaanik aalisarnikkut piniarnikkullu sippulimmik aporfissalersuinerup unitinneqarnissaa ilungersuunniarlugu.

- Aalisartut piniartullu inuussutissarsiornikkut imminnut napatillutik  pilersornissaat anguniarneqassaaq, taamaammat killiliussarititaasut naleqqussarneqassapput, Hans Enoksen taama allappoq.

Partiip anguniakkaminik nalunaarutaa ataani atuarneqarsinnaavoq.