- Ineqarnermut akit qaffasippallaarujussuarnerat ukiuni makkunani unammillernarnerpaajuvoq . Tassanilu aningaasarsiakitsut sulisartukkormiut allallu akinik ilungersunartorujussuarmik atugaqartippavut, allaat inuussutissaqarniarnerat meeqqanik pilersuiniarnerat allallu artukkerneqartarlutik. Taamaammat tassani akit appartinneqarnissaat ilungersuutigalugu anguniaqqissavarput, neriuppungalu partiit allat tassani peqatigaluta anguniagaqarnitsinni ikiussagaatigut.
KNR-ip qinersinissatta tungaanut apeqqutit marluk partiinut akeqquniarpai:
Nunatsinni ajornartorsiutit annersaat suua?
Qanoq aaqqinniarpisiuk?
Partiit akissutaat KNR-ip qinersinissaq pillugu quppernerani #IQ2018-imi atuarsinnaavatit.
Partii Naleqqamiit tamanna qanoq iliuuseqarfiginiarneqarpa?
- Ukiut siuliinili uparuartortarpagut ilaatigut ineqarnermut tunngasut, akit qaffasippallaarnerannut pissutaapput selskabit arlallit pilersinneqarsimammata. Aningaasartuutimmi matussuserneqartussaapput, taamaammat selskabit ilaat atorunnaarsinneqartariaqarput akillu naleqqussarneqartariaqarlutik. Taakkunaniinnaanngitsoq aamma nunaqarfinni illuliorneq tamarmi uninngavoq, inuusuttut meeqqiortut angajoqqaaminni aatakkuminniluunniit najugaqarput tamannalu allanngortittariaqarpoq, namminerisamik ineqarneq pilluarnerulernissamut meeqqanullu perorsaanissamut pitsaanerpaamik aqqutissiuussisarmat.
Akissaqanngilagut tamaasa immikkut; Illuut A/S, Iserit A/S INI A/S taavalu kommuunit aamma immikkut ingerlatsillutik, akissaqanngilagut. Akiliisussammi tassatuaapput ineqarnermut akiliisartut taakkununngalu akigitinneqartoq apparsarneqartariaqarpoq qaffasippallaarujussuarmat, Partii Naleqqami siulittaasoq, Hans Enoksen taama oqarpoq.
Partiini arfineq-marluusuni alla aqagu apeqqummut akissuteqartissavarput.