Partii Inuit partiimut tapiissutaasartut oqaaseqarfigerusunngilai
Oqaluttuaq taanna Atuagagdliutit sapaatip-akunnerani uani sammivaat. Partiiaraq taanna aningaasaaterpassuaqartoq tassani ingerlaannaq erserpoq.
Qaammatit siulliit qulingiluat qinersinerup kingorna Partii Inuit 802.000 koruuninik 2013-imi aningaasaliiffigineqarsimapput; imaluunniit qaammammut 90.000 koruuninik. Lars Mathæussenillu aninerata kingorna aningaasat taakku tamarmik partiimi ilaasortaasutuamut Randi Brobergimut tuttalerput.
Taamaattumik Atuagagdliutit partiip siulittaasuanut Nikku Olsenimut saaffiginnippoq paasiniarniarlugu aningaasanit taakkunannga qassit partiip allattaanut tassunga tuttarnersut.
- Apeqqutit taamaattut akineq ajorpakka, Nikku Olsenip Atuagagdliutit isumaluttumik naatsumik akivai.
Partiimut tapiissutit partiip oqaaseqartuata oqaasiisa nutserneqarnerinut assigisaannullu atorneqartarput.
Aningaasalli tamatumunnga atorneqarneq ajorput. Parti Inuit naluneqanngitsutut oqaaseqaatit kalaallisuumiit qallunaatuumut nutserusuttanngilaat. Inatsisartut siulittaasuata tamatuma misissuiffigineqarnissaa pisariaqarnerareerpaa. Ilisimatitsissutigalugulu parti pinngitsaalineqarsinnaanngitsoq, taamaattumik periarfissat allat misissortariaqartut.
- Soorunami tapiissutit annertussusaat aalajangerneqartarput nutserinermut aningaasat ilaasa atorneqarnissaat naatsorsuutigalugu. Taamaattumik siumoortumik nalilersussavarput qanoq annertutigisumik taperneqassanersut. Siulittaasoqarfimmi katersuunnermi tullermi oqaluuserisariaqassavarput, Lars-Emil Johansen Atuagagdliutinut oqarpoq.
