Partii Inuit Inatsisartuni malittarisassat malikkumajunnaarpaat

Partii Inuit ukiup aallartilaarnerani Nikku Olsenimit tunngavilerneqarmata, oqaatsivut Olsenimut partiimillu pilersitseqataadunut qitiulluinnartuupput. Kingorna oqaatsit pillugit PI-p tungaanit tutsiuttoqarpiarsimanngilaq. Olsenilli oqaatsit maanna qaqeqqippai oqaluuserisassatullu siunnersuutit oqaaseqaatillu danskisuunngorlugit nutserneqartarnissaannik piumasaqaat malikkumajunnaarlugu nalunaaruteqarluni.
Allattoq Peter Troelsen, Simon Uldum
oktobarip 04-at 2013 11:13

Partiimik pilersitsisoq isumaqarpoq partiit kalaallisut danskisullu attaveqaqatigiinnerminni pisussaaffigisaannik atorunnaarsitsisinnaalluni. Kalaallit oqaasiisa nunatsinni pisortatigoortumik oqaasiuneri innersuussutigaa allamiullu oqaasii atorlugit attaveqaqateqarnissaq peqataaffigiumajunnaarlugu.

-Immikkut oqaatigisariaqarput piffissanngoreernikuummat Naalakkersuinermi aammalu inatsisartoqarnerup iluani sulinitsinni nukiit annertunerpaat nammineq oqaatsivut atorlugit sulinissaq, pinngittoorani qallunaatuumut nutserisussaatitaaneq piffissarujussuarmik atuiffiummat aningaasarpassuarnillu naleqarmat, allanut inuiaqatigiit kalaallit pisariaqartitaannut siunertaqarnerusunut uagutsinnullu iluaqutaanerusunut atorneqartariaqalersut isumaqaratta, Nikku Olsen isumaqarpoq.

Aammattaaq Nikku Olsen aperivoq kalaallit nammineq pisariaqartitagut tunulliuttuarlugit inerisaaniarutta qaqugu naalagaaffinngorsinnaassanersugut. Nikku Olsenip inuiaat kalaallit ilungersorluni kaammattorpai naalagaaffinngornissamik takorluukkap piviusunngotinnissaanut nammineerlutik alloriaqqullugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq