Partii Inuit Atassummi eqqartuleraat

Nikku Olsenip nittartakkatigut aviisip pasilliutai sakkortuumik ilumuunnginnerarpai, pisasisaajunnaarnissanilu anguniarlugu politiilersuunniarlugit sioorasaaraluni.

Allaatigisatigut akerleriissutaanera pissutigalugu partii naalakkersuisooqataasup suliaq Partii Inuinik suleqateqarnerminnut kinguneqassanersoq oqallisiginialerpaat.

 -Aap, soorunami partiimi oqallisiginiarparput, paasissutissalli saqqummersut nutaarluinnaammata kingusinnerusukkut oqallisigissavarput, Partii Inuit siulittaasuanik Sermitsiami pisuutitsinerit kingulliit pillugit paasitinneqarnermini kingorna Atassutip siulittaasua Gerhardt Petersen taama oqarpoq.

Nittartakkatigut aviisi naapertorlugu tusarfiit imminnut attuumassuteqanngitsut pingasut nassuiaasimapput Nikku Olsenip Inatsisartuni ilaasortaanissaminut naleqqutinngitsut aalajangiiffineqarneranut isassineriinnaq peqqutaanngitsoq.

Tusarfiit aviisimut oqaluttuarput partiip siulittaasuata arnaatigisimasani tukkarlugulu tilluarsimagaa. Ima pullassimatigaat allaat isiata aappaa mamisimalluni, aammalu arnap qitornaata taamani arfinilinnik ukioqartup pisoq takusimagaa, aviisi allappoq.

Paasissutissat saqqummersut nutaat ilumoorpata naalakkersuisooqatigiilluni suleqatigiinnermut kinguneqaratarsinnaavoq.

Gerhardt Petersenili Atassullu Partii Inuinik suleqateqarnerminnut tunngatillugu maannakkorpiaq iliuuseqarnianngikkallarput.

-Maannakkutut iskkoqartilluguunngitsoq. Soorunami Atassutip iluani eqqartorparput, partiillu qinigassanngortitsinnginnerminni qinigassanngortinniarlugit pillagaasimanermut/pillagaasimannginnermut allagartaannik pissarsisarnissaannut kaammattuinnarusuppagut, Gerhardt Petersen oqarpoq.

 -Soorunami taamatut kaammatuuneqassalluni pitsaavoq, maannali pissutsinut isumminngilasi?

 -"Isassinermik suliaq" soorunami ilisimavarput, paasissutissalli nutaat partiimi suli eqqartunngilagut, Atassutip siulittaasua oqarpoq.

Gerhardt Petersenip partiimi ilaasortat aqagu katersornissaat naatsorsuutigaa Nikku Olsenimut Partii Inuinullu tunngatillugu pisut kingulliit eqqartorniarlugit.

Naalakkersuisunut siulittaasoq Aleqa Hammond, Siumut, oqaaseqartinniarsarigaluaratsigu iluatsinngilarput.