Parnaarussivik Guantanamomiittoq Obamap matunialerpaa

Amerikamiut sakkutooqarfianni Cubamiittumi Guantanamomi parnaarussivik ukiup ataatsip ingerlanerani matussallugu Barack Obamap qineqqusaarnermini neriorsuutigisani piviusunngortilerpaa.
Allattoq Jaaku Lyberth
januaarip 22-at 2009 16:17

Aviisip politikenip allaaserisaa aallaavigalugu ukiup ataatsip ingerlanerani parnaarussiviup matuneqarnissaa Obamap peqqussutigisimavaa, tassalu kingusinnerpaamik aappaagu 2010-imi januaarip ulluisa 22-anni parnaarussivik matuneqaqquaa.

Guantanamop pisortatigoortumik matuneqarnissaanut peqqussummik Obama atsiorpoq, maannakkullu paasiniassavaa parnaarussat 245-it sakkutooqarfimmi parnaarusimaneqartut qanoq pineqassanersut.

Parnaarussat ilaat nunagisaminnut utertinneqarsinnaanersut misissorneqassaaq. Parnaarussat ilaat ukiut tallimat parnaarusimaneqarput, eqqartuussivimmut sassartinneqaqqaaratik parnaarunneqarsimasut.

Pinerliiniartartutut pasineqartut killisiorneqartarneranni naalliutsitsisarnerit unitsinneqarnissaat Obamap ullumi aamma peqqussutigivaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq