Parnaarussiviit ukioq 2012-imi sananeqarsinnaassapput

Eqqartuussiveqarneq pillugu Ataatsimiisitaliarsuup isumaliutissiissutaanit innersuunneqarsimasut piuviusunngorsinnaanngorput.

Inatsisinik Atortitsinermut Danmarkimi ministerip, Lene Espersenip, aamma Ilaqutariinnermut Inatsisinillu Atortitsinermut Naalakkersuisup, Aleqa Hammondip, ullumi ataatsimiinneranni isumaqatigiissutigineqarpoq, innersuussutigineqarsimasut ataatsimoortillugit danskit naalagaaffiannit akilerneqassasut.

Namminersornerullutik Oqartussat piumasaqaataat inatsiseqarnermut ministerimit suleqataaffigiumaneqarput. Eqqartuussiveqarnerup nutarterneqarnissaanut sulineq aappaagu juulip ulluisa aallaqqaataanni aallartereersinnaasoq ilimagineqarpoq. Pinerluttulerinermut inatsit eqqartuussisarnermillu inatsit aappaagu atuutilersinneqarsinnaanissaat naatsorsuutigineqarluni.

Pineqaatissinneqarsimasut inissiisarfissaannik sanaartornissaq, tassungalu atatillugu matoqqasumik parnaarussiviliornissaq, Eqqartuussiveqarnermut Ataatsimiititaliarsuup innersuussutaasa ilagaat, taakkulu ukioq 2012-imi imaluunniit 2013-mi sananeqarnissaat naatsorsuutigineqarpoq.

Lene Espersen-ip Aleqa Hammond-illu ullumi ataatsimiinnerannit unnugu Radioavisimi annertunerusunik tusagaqarumaarpusi.