Parnaarussat siunissami nunatsinniilissapput
- Killiligaanngitsumik Danmarkimi parnaarussivinnut inissiisarneq ukiorpassuarni kanngunartuliatut isigineqartariaqartutut allaat oqaatigerusutara, maannakkut aaqqissinnaannguleriartorparput tassami nunatsinni matoqqasumik isertitsiviliornissaq maannakkut inatsisiliornikkut tunngavissinneqarmat. Taamaalillunilu Herstedvesteriliartittakkat siunissami pisariaarutissapput, Lars-Emil Johansen oqarpoq.
Taanna aperaarput eqqartuussisoqarneq Kalaallit Nunaata nammineq akisussaaffigisatut tigujartuaalersimaneraa.
- Taama oqartoqarsinnaagaluarpoq imarisaa eqqarsaatigalugu, kisianni aningaasartaa eqqarsaatigalugu suli taama oqartoqarsinnaanngilaq. Namminersorneq pillugu isumalioqatigiissitap suliaa najoqqutarineqassappat, taava oqartussaaffiup taassuma tigunera kalaallit inuiaqatigiit akissaqartilerunikku namminneq akilertussaassavaat. Kisianni tassa maannamut pilersaarusiornerani nunatsinninngaanniit naalakkersuisuniit inatsisartuniillu isumagineqarsimavoq, isumaqatigiissutigineqarluni oqartussaaffik ineriartortinneqarsimanngitsoq illutamigut allatigullu kataattoq tiguneqassanngitsoq aatsaallu iluarsaanneqaqqaarpat nunatsinnut ullutsinnullu naleqquttumik aaqqinneqarpat tiguneqarnissaa piareerfigineqassasoq, taama oqarpoq, Siumut tunuliaqutaralugu Folketingimi ilaasortaq Lars-Emil Johansen.
