Parnaarussat misissuiffigineqaqquaat
Siunnersuut Inatsisartuni ullumi oqaluuserineqarmat, amerlanerussuteqartut akuersipput, aappassaaneerneqannginneranilu Inatsisartut Inatsisit Atortinneqarnerannut Ataatsimiititaliaannut suliareqqitassanngortinneqarluni.
- Naalakkersuinermik suliaqartunut innuttaasunut inuiaqatigiinnullu pingaartuuvoq Herstedvesterimi parnaarussat iperagaanermik kingorna qanoq ingerlasarnersut paasissallugu, Lene Knüppel tunngavilersuutimini allappoq, Nunatsinni matoqqasumik 2013-imi isertitsiveqalernissaq sioqqullugu misissuisoqartariaqarnera ujartorlugu.
Herstedvesterimi parnaarussaaqqasimasut pillugit inatsisinik ilisimatooq Evy Frantzen misissueqqammerpoq, kalaallillu parnaarussaaqqasimasut pillugit naammaginanngitsumik nalunaarsuisoqartarsimasoq paasinarsivoq.
Siunnersuuteqartoq Lene Knüppel Siumup politikkikkut oqaaseqartartuanit Lars-Emil Johansenimit taperserneqarpoq:
- Eqqartuunneqartartut ilaasa Herstedvesterimi inissinneqartussanngorlugit eqqartuunneqartarnerat, eqqartuussisoqarnikkut pissutsitta ilerasuutissartaanik taassallugu ingasaassinerussanngitsoq isumaqarpunga, Lars-Emil Johansen oqaaseqarnermini ilaatigut oqarpoq.