Kalaallit Herstedvesterimi parnaarussat kalaallinit inuiaqatigiinnit sumiginnagaasutut misigisimapput. Taama isumaqarpoq inatsisinut ilisimatooq, Evy Frandsen, kalaallit Herstedvesterimiittut pillugit nalunaarusioqqammersoq:
Parnaarussat nalunaarsuiffiini ersertarpoq angerlarsertorujussuusartut. Aamma nunaqqatiminnit sumiginnagaasutut misigisimapput, Kalaallit Nunaata ajattorsimagaatik. Takornartatut Kalaallit Nunaannullu ungasissorujussuarmiillutik misigisimasarput, Evy Frandsen oqarpoq, nangillunilu:
-Parnaarussat ilaat kalaaliujunnaarsimallutik aamma misigisimasarput, kisianni aamma danskiunngillat, tassa imaappoq ”suunngitsutut” misigisimasarput.
Kalaallit parnaarussat sivisoorsuarmik Herstedvesterimiittarput. Evy Frandsenip tamanna ima itisilerpaa:
-Sivisussusissaa killilerneqanngitsumik parnaarunneqarsimagaanni, nalullugu qaqugu anissalluni, taava kinaassuseeruttutut misiginartarpoq, siunissarlu pilersaarusiorneqarsinnaanngilaq, Evy Frandsen oqarpoq.
Taanna isumaqarpoq, kalaallinut parnaarussanut pilersaarusiortalernissaq isumassarsialatsiaassagaluartoq.
-Ersarissumik siumullu sammisumik pilersaarusiorsinnaagaanni tamanna sunniiniutaassagaluarpoq pitsavik, Evy Frandsen tikkuaavoq.