Parnaarussat amerlanersaat eqqiliupput nunaqavissuullutillu

Canadami parnaarussat amerlanersaat eqqiliupput nunaqavissuussutillu. Parnaarussanut allanut naleqqiullutik ajornerusumik pineqartartut, Canadami ombudsmandip nalunaarusiaani sapaatip-akunnerani kingullermi saqqummersumi tamanna atuarneqarsinnaavoq.

Canadami ombudsmandip, Howard Saper-ip, nalunaarusiaa naapertorlugu, nunaqavissunik ajortumik pinnittarneq nunaqqatinut kanngunarsaataavoq, nutaarsiassaqartitsivik CBC tusarliussivoq. Nunaqavissut immikkoortinneqartarput; assersuutigalugu akuttunerusumik akuerineqarlutik misiligummik iperagaagallartarput.

Canadami nunaqavissut canadamiunut allanut naleqqiullutik qulingiluariaammik parnaarussivimmut inissinneqartarput.

Arnat parnaarussivianni arnat pingajoraarterutaat nunaqavissuupput. Navianarnerusunut parnaarussivinniittut affangajaat nunaqavissuupput.

Canadami isumannaallisaanermut ministerip, Stockwell Day-ip, ombudsmandip nalunaarusiaa ilumuunnginnerarpaa, oqarluni, immikkoortitsisoqarnera uppernarsaatissaqanngitsoq.