Parnaarussarpassuit qimarrapput
Talipanimiut pikititsisuisa ippassaq unnukkut parnaarussivissuaq Kandeharimiittoq saassuppaat.
Imminut toquutigalutik qaartitsisut marluk parnaarussivissuup isaariaani qaartitsereermata, pikititsisorpassuit parnaarussivimmut isaarrapput.
Taamaalimmat parnaarussat 1100-nik amerlanerusut qimarrapput, taakkununnga ilaallutik Talipanimiut pikititsisui 400-juusut.
Afghanistanimiut sakkutuuisa nunat tamalaat sakkutuuinik ikiorserlutik ullumi talipanimiut parnaarussivimmiit qimaagaluartut 30-t missaaniittut toqukkaat nalunaarutigineqarpoq, 20-illu qimaagaluartut ilaat tigusarineqarsimasut, nutaarsiassaqartitsiviup Ritzauip allaaseraa.
Afghanistanimi oqartussat avammut mianersoqqussummik nalunaaruteqarput oqarlutik parnaarussat qimaasut sinneri sulili tigusarineqanngitsut namminneerlutik tunniutiinnaqqullugit taamaaliunngikkunik tigusarineqarunik pillagaanerat sivitsorneqartussanngussammat.
