Parisimi politiit misissuineranni imminut pilliutigaluni qaartitsisoqartoq

Politiit Parisip avataatungaani St. Denisimi pakasaallutik inissiat ilaanni maanna misissuileruttorput, inuillu tallimat unnuaq ullaaq mannalu tigusarineqarsimallutik. Frankrigimi naalagaaffiup unnerluussisussaatitaasuata tamanna Frankrigimi tusagassiorfinnut assigiinngitsunut nalunaarutigaa, BFMTV taakkununnga ilaalluni.

Allattoq Mads Lynge

novembarip 18-at 2015 06:57

Arnaq imminut pilliutigaluni aamma qaartissimasoq, unnerluussisussaatitaasup nalunaarutigaa, politiimmi inissiamut tassunga iserterneranni imminut qaartissimagami. Inuit sisamat allat peqatigalugit arnaq taanna inissiamut mattussimapput.

Angutit pingasut inissiamiittut politiinit tigusarineqarput, angutilli suli kinaassusersineqarsinnaasimanngillat. Inuit allat marluk, arnaq angullu, inissiap ungasinngisaani tigusarineqarsimallutik.

Inuk ataaseq inissiami imminut suli mattussimasoq, Frankrigimi aviisit annerit ilaata Le Figarop allaaseraa, tamannali suli uppernarsineqarsinnaasimanani.

Aamma atuaruk LIVE & ASSIT Attaveqaqatigiittarfinni #Paris pillugu nutaarsiassat kingulliit

Politiit pakasaallutik iliuuseqarnerat peqqarniisaarniarnermik aaqqissueqataasimasumik ujarlernerannut tunngavoq, tassa Abelhamid Abaaoud, peqqarniisaarniarnermik aaqqissuisimasutut pasineqartoq ujaarineqarami.

Angutip inissiat ilaannut imminut mattuttup angutit ikinnerpaamik marluk allat peqatigigai Frankrigimi tusagassiorfiit nalunaarutigaat. 26-nik ukiulik Salah Abdeslam taakkununnga ilaanerarneqarpoq. Abdeslam Parisimi saassussinermut peqataasimasutut pasineqartunut ilaavoq, kingornalu ujaarineqalerluni.

St. Denis Parisip avataatungaaniippoq, Frankrigip isikkamik arsaallutik nunanut allanut unammisartuisa arsaattarfiat Stade de France ilaatigut tassaniilluni. Arsaattarfik taanna tallimanngormat saassunneqartunut ilaavoq.

St. Denisimi najugallit qimagutitinneqarsimapput, qimuttuitsullu St. Denisimi maanna uneqqusaajunnaarsinneqarput, sakkutuujunngitsullu aamma qimagutitinneqarsimallutik.

Parisimi sumiiffinni arfinilinni tallimanngormat aallaasersortoqarlunilu qaartartumeerisoqarmat inuit 129-t toqutaapput.