Pappiarat takusinnaassavaat
Tamanna illuatungiliuttunit nuannaarutigineqarpoq, taakkuami amerikamiut timmisartuisa Nunatsinnut akunnittarsimanerat pillugu sumulluunniit attuumassuteqanngitsunik misissuititsinissaq suli piumasarigamikku.
- Iluanaarluni pisimasut pillugit danskit allattugarisarsimasaasa atuarsinnaanerat Nunanut Allanut ministereqarfiup akuersissutigaa. Tamakkua ulluni qaninnerpaani atuassavakka, Enhedslistenimeersoq, Frank Aaen, nutaarsiassaqartitsivimmit Ritzauimit issuarneqarpoq.
Taamaalilluni taanna piareersarluarsimalluni Folketingimi pingasunngorpat apeqqarissaaqataasinnaalissaaq.
Danskit naalakkersuisuisa ukiut marluk matuma siorna misissuititsisimanertik, Nunanut Allanut ministerip Lene Espersenip oqaatigiuartuaraluaraa, Holger K. Nielsenip SF-imeersup Nunanut allanut ataatsimiititaliamik ataatsimeeqateqarnerminni upperinerulernagu ullumi oqarpoq.
- Pisimasut misissorneqarnissaat piumasarineqarnerariarlugu amerikamiut eqqissisarlugit oqarfigineqarsimapput pisimasut sukumiisumik misissorneqassanngitsut.Taamatut Wikileaksimit saqqummiunneqartut marloqiusamik pissusilersorsimaneq pasinartorujussuanngortippaat. Pasinartullu Nunanut Allanut ministerimit ullumi akerlilerneqanngillat, Holger K. Nielsen oqarpoq.
- Folketingimi sapaatip akunnerata tulliani oqallinnermi misissuititseqqinnissamut isumaqataasut amerlanerussuteqarnissaat savalimmiormiut Folketingimi ilaasortaatitaata, Høgni Hoydalip, Lars Emil Johansenitulli ilimagingilaa.
- Kalaallit Nunaanni Savalimmiunilu Naalakkersuisut piumasaqaateqarnerisigut aatsaat misissueqqittoqarsinnaanera, uanga isumaga naapertorlugu periarfissatuaalissaaq, Høgni Hoydal oqarpoq.
