Pappiara atorlugu qiortaalluni kusanartuliat
Nunami apisimasumi uumasut inuillu, qaannamik piniartoq kameeqqallu pinnersaatitut atorneqartut. Tamakkuupput Søren Thaae-p atuakkiaani pappiaramit qiortakkani takuneqarsinnaasut ilamininngui. Atuagaq taaguuteqarpoq "Kalaallit Nunaat pappiaramit qiortakkat".
aggustip 31-at 2009 07:35
Søren Thaae aliikkutaralugu siornatigut atuakkioreernikuuvoq, tassa pappiaqqat, kartonngi allallu atorlugit qanoq sanasoqarsinnaanersoq takusassiaralugu. Kalaallit Nunaannulli angalareerluni kalaallit kulturiat soqutigilersimagamiuk una atuakkiani isumassarsiarisimavaa.
Ilaatigut aarrit, puisit, oqaluttuatoqqat, kiinarpaat allallu qiortarsimavai, naggataagullu juullimut pinnersaatinik arlalinnik aamma qiortaasimalluni, soorlu uummataasiorsimavoq, puisip amia atorlugu.Tamakku qanoq sananeqarnissaat ilitsersuusioqqissaarsimavai.
Atuagaq "Grønland Papirklip" atuakkanik naqiterititsisarfik Milik aqqutigalugu saqqummersinneqarpoq, 160 koruuninillu akeqarpoq.
