Panini arfinilinnik meeraqarfigaa
Meeqqat arfineq aappassaat naalungiarsuulluni toqummat kissarsuummi ikuallassimavaa. Inuup sananeqaataasa misissornerisa ersersippaat panimmi meeraanut Fritzl ataataasoq.
Josef Fritzl ulluni 14-ini tigummigallagassanngortinneqarpoq. Ataasinngormat nassueraluariarluni inatsisit tunngaviusut naapertorlugit killisiorneqarnermini oqarusussimanngilaq.
Angut 73-inik ukiulik pisimasut pillugit malunnartumik kanngusunngilaq, kinguaassiuutitigullu atornerluisarsimanini soqutaavallaanngitsutut eqqartorniarsaralugit.
Fritzl ilaatigut oqaluttuarpoq panini, Elisabeth ikiaroortalinnginniassammat paarnaarussimallugu, meeraallunigooq naalanngippallaaqimmat, østrigimi aviisi Kronen-Zeitung taamatut allaaserinnippoq.