Panimminik atoqatiginnittartoq pillarneqarpoq

Danmarkimi meeqqanik kinguaassiutitigut atornerluinerit pillugit pineqaatissiisoqartalermalli aatsaat taamak sakkortutigisumik ippassaq pineqaatissiisoqarpoq, ataataasoq 47-nik ukiulik panimminik marlunnik ukiuni arlalinni atoqateqartarsimasoq ukiuni qulini parnaarussassanngortinneqarpoq.

Ataataq 47-nik ukiulik nammineerluni panimminik atoqateqartarsimavoq aammalu angutit arlalippassuit panimminut atoqatigitittarsimavai ingammik panini angajulleq quliinnarnik ukioqartorli angutinut allanut atoqatigitittarsimallugu.

Ataataasup eqqartuussivimmi suliat assigiinngitsut 19-t uppernarsaasunik allanik killisiuisoqanngikkaluartoq tamaasa nassuerutigai.

Oqaluttuarineqarpoq pineqaatissiinerit eqqartuussivimmi atuarneqarmata imminut pisuusutut tamaasa akuerisimagai.

Atornerluineq aallarteqqaarmat angajoqqaat taakku marluullutik panitsik kinguaassiutitigut atornerluttaleqqaarsimavaat. Anaanaasoq ukiorpassuarni atortittartuusimavoq, angutinillu pulaartoqaraangat panii marluk mattunneqartarsimapput.

Kingorna paniat angajulleq angutinik pulaartoqarnermi atortittartussatut sungiusakkatut sassartinneqartalersimavoq

Arnaata ilaquttani 2004-mi qimassimavai niviarsiaqqallu angutaata taamanili kisimeeqatigilersimallugit.