Palæstinamiut inuinnaat toqqoqqasariaqarsimapput

Palæstinamiut namminersorlutik ingerlatsinerat, uivernermit aamma aqqusinerni akersuunnernit sequtserneqalerpoq. Suliniaqatigiiffiit Hamas aamma Fatah akersuupput palæstinamiullu inuinnaat aallaaneqarumanatik toqqoqqasariaqarput.

Akersuunnerit Gaza-mi ingerlanneqarput ullumilu toqutaasut ikinnerpaamik 13-upput.

Ullaaq manna eqqissiviilliornerit aallartipput Hamas-ikkut 200-nik amerlassuseqarlutik Fatah-p nuimasortaasa ilaata angerlarsimaffia ungusarimmassuk. Sakkutooqatigiit pingasut, isumannaatsuunissamik suliaqartut, Fatah-mit aqunneqartut angutip taassuma nakkutigisarai.

Angerlarsimaffimmik ungusarinninnermi paarsisut tallimat toqutaapput, illullu ilaa ikuallatsinneqarluni.

Saassussinermili soqutigineqarnerpaaq, tassa Fatah-p nuimasortaasa ilaat, angerlarsimanngilaq.

Biili Hamas-ikkut kingusinnerusukkut saassuppaat inuillu tallimat toqullugit, kisiannili paasinarsivoq iligisatik toqussimagaat. Sunaaffa taakkua akeqqaminnit Fatah-kunnit tigusaaqqasimasut. Saassussinermi Fatah-kkut isumannaatsuunissamik suliaqartut marluk allalu saneqqutilersoq toqunneqarput.

Gaza-p illoqarfiani aqqusernit ullumikkut inoqarpianngillat, annerusumik angutit sakkulisartut kiinartillu asserlugu nasartorsimasut kisimik takussaanerullutik.

Inuinnaat angerlarsimaffimminni igalaat assersorlugit aqerlunit eqqortinnaveersaarput, aamma Gazap illoqarfiata ilaa ullumi innaallagiaqarsimanngilaq.

Hamasikkut Fatah-miunut saassussinermik saniatigut qaartartunik igeriuttakkanik Israelimut killeqarfik qulaallugu igeriussisarsimapput. Qularnanngitsumik palæstinamiut imminnut akersuunnerannut israelimiut ilaaqqunnissaat kissaatigigaluarlugu.

Israelimiut akillutik Hamasip qullersaqarfiisa ilaat Gazap kujataaniittoq qulimiguulimmiit eqqaassimavaat.

Fatah aamma Hamas naalakkersuisoqatigiikkaluarput, akersuunnerillu siuttuisa ulluni kingullerni unitsinniaraluarpaat. Sakkuaakkunnaarnissaq arlaleriarlutik isumaqatigiissutigisaraluarpaat, taakkuli sivikitsuinnarmik atuuttarput.

Palæstinamiut præsidentiat Mahmoud Abbas aqagu Gazaliarniarpoq naalakkersuisut siulittaasuat oqaloqatigiartorlugu.

Oqaluuserisassaasa ilagissavaat palæstinamiut sukannersumik peqqussuteqarfigineqarnissaannut tunngasoq.