Palle: Suut tamarmik isumaqatigiinniutissaapput

Aningaasanut inatsisissatut siunnersuut siunnersuutaasoq, aningaasaqarnermut naalakkersuisoq erseqqissarpaa, isumaqatigiinniarnissanullu aggersaalluni.

Kisianni taanna naliliivoq, Illua tungiliuttut partiivi assigiinngitsunik oqariartuuteqartut.

- Oqariartuutit assigiinngillat. Illua tungiliuttut partiiata aappaa sumulluunniit tunngasumut suleqatiginnikkusunngilaq. Partiip aappaata kissaatini tusaaniarneqarpata, aamma namminneq naaperiaassallutik oqalupput. Tassalu massakkut assigiinngitsorpassuit isumaqatigiinniutigineqalissapput, Aningaasaqarnermut naalakkersuisoq Palle Christiansen oqarpoq, erseqqissarluguli:

- Suut tamaasa isumaqatigiinniutigineqarsinnaapput. Taamaallaalli pingajussaaneerlugu suliarinerani, suut tamarmik oqimaaqatigiittariaqarlutik. Tassami ingerlatsinermut sanaartornermullu aningaasartuutit amigartooruteqarnissaannut akissaqanngilagut, Palle Christiansen oqarpoq.

Aamma akitsuutissat nutaat nuannarineqanngeqisut, soorlu ikummatissanut akitsuutissat, aammalu akitsuuteqanngitsunik eqqussisinnnaajunnaarnissaq pillugit oqarpoq, isumaqatigiinniarnissamut piareersimalluni.

- Akitsuuteqanngitsunik eqqussisinnaajunnaarnikkut imaluunniit allatigut aningaasanik pissarsissanerluta aalajangiusimaqqinnaanngilarput. Uagut siunnersuusiuinnarpugut, atugarissaarneq qanoq aningaasalersussanerlugu, Palle Christiansen oqarpoq.

Naalakkersuisuutitaqartut partiianni allami, Inuit Ataqatigiinni, aningaasaqarneq pillugu oqaaseqartartoq Naaja Nathanielsen aamma neriuppoq aningaasanut inatsit partiit amerlasuut peqataaffigissagaat, naak ualeq mannna oqallinneq taamannak isikkoqanngikkaluartoq .

- Partiit oqaseqartuisa oqaasii naapetussagaanni taamaappasinngilaq. Kisianni neriussinnaatitaavugut, aamma aningaasanut inatsit partiinit amerlaasuunit peqataaffineqarnissaanut anguniagaqarsinnaatitaavugut, Naaja Nathanielsen oqarpoq.

Tassami oqarneratut:

- Assigiinngitsutigut isumaqatigiittugut, assigiinngitsutigullu anguniakkavut assigiittut qularnanngilluinnarpoq.

Illua tungiliuttulli partiivisa annersaanni Siumumi isumalluannginerupput.

- Eqikkarlugit oqassaguma, qanoq isilluni naapeqatigiittoqarsinnaanera takujuminaatseqaara, Siumup aningaasaqarneq pillugu oqaaseqartartuata Per Berthelsen oqarpoq. Palle Christiansen ingammik ajornartorsiutaasoq oqaatigaa:

- Naalakkersuisut siulittaasuata inussiarnersumik naapeqatiginninniarneq anersaaralugu oqariartaasia isumalluartitsisarpoq. Tamannali qaminneqarluinnartarpoq, aningaasaqarnermut naalakkersuisoq oqaluleraangat. Nikaginnippalulluinnartumik oqaatsit atortagai suleqatiginnikkusussusermut toqusaataasarput, isumalluarneq allaat ipitittarlugu, Per Berthelsen oqarpoq.

Taamali isornartorsiuineq Palle Christiansenip soqutiginngilaa, tassami Naalakkersuisut isumaqatigiittut tunuliaqutigai:

- Oqaluttarfimmiit nassuiaatikka, Naalakkersuisuni isumaqatigiissutigalugit saqqummiuppakka. Aamma naggasiillunga tamanik suleqatiserinnillunga oqarnera Naalakkersuisut sinnerlugu oqarneruvoq. Taava Inatsisartut ilaat suleqatiserinninneq akorumanngilaat, Palle Christiansen akivoq.

Illua tungiliuttut partiivini minneq, Atassut, ualeq manna oqallinermi saamasaarneruvoq, neriorsuereerlunilu akitsuutissaq minnerpaamik ataaseq akuersaassallugu.

Kisianni Siumup inatsisartuni kiserngorunnissa, Per Berthelsenip ernummatiginngilaa,