Palle nassuiaasariaqassaaq
Namminersorlutik Oqartussat Nuummi allaffeqarfiisa ilaat, Atuisartut Siunnersuisoqatigiiffiannit atorneqartoq, maajimi oqoqartoq paasineqarpoq.
Taassuma kingorna iluarsartuunneqarneranut aningaasat qinnutigineqartut 1.263.000 koruunit atorneqarsimapput. Aningaasat ingerlatsinermut sillimmatigineqartunit tiguneqarnissaat naalakkersuisut qinnuteqaamminni innersuuppaat, tamannalu aningaasaqarnermut ataatsimiititaliamit iluarineqanngilaq. Aningaasat atorneqareersut matussuserniarlugit qinnuteqartoqaqqusaannginnera ataatsimiititaliamit taakkartorneqarluni.
Aningaasaqarnermullu ataatsimiititaliap isornartoqartitaanit taanna kisiartaanngilaq.
Allaffeqarfiup iluarsartuunneqarnissaa sioqqullugu oqoqarnera sanaartornermut siunnersortinit assigiinngitsunit arlaleriarlugu misissorneqarpoq. Misissuisimanermilu inernerit assigiittuaannarsimallutik.
Tamanna pissutigalugu Palle Christiansen aningaasaqarnermut ataatsimiititaliamit nassuiaaqquneqarpoq, misissuinerit arlaqartut ingerlanneqartarsimanerat pillugu.
Allaffeqarfiup oqoqartup, Namminersorlutik Oqartussanit attartorneqartup iluata aserfallatsaalineqarnissaa sooq Namminersorlutik Oqartussat akissaajaatigissaneraat aningaasaqarnermut ataatsimiititaliap paaseruppaa.
Allaffeqarfiup oqoqarnerata paasineqarneranit qaammatit arfineq marluk qaangiummata aatsaat iluarsaanneqarnissaannut aningaasanik Palle Christiansenip qinnuteqarnini nassuiartussanngorpaa.
Aningaasaqarnermut Naalakkersuisup Palle Christiansenip akissuteqarnissaa aningaasaqarnermut ataatsimiititaliap utaqqiniarpaat, aningaasaliissoqassanersoq aalajangissallugu.