Palle Christiansen tunuarpoq - Andreas Uldumip taarsissavaa

- 2001-imi aallartikkama politikkikkut anguniakkakka angusimallugit misigisimavunga, aamma tunuarnissara piffissami sivisuumi pilersaarusiorsimavara. Danmarkimi kigutit nakorsaattut maanna sulilissaanga. Græstedimi kigutilerisarfimmut piginneqataassutinik piseqqammerpunga. Politikkili iperavissornianngilara, Danmarkimimi partiimut Liberal Alliancemut ilaasortanngorpunga liberalimillu isiginnaatsima sulissutiginissaa tassani ingerlateqqissavara, Palle Christiansen oqarpoq nangillunilu:

- Nunatsinni politikkikkut allanngueqataaffigisimasannik tikkuagaqassaguma, tassaasimavoq Demokraatit sivikitsuinnarmik atanissaannik kikkut tamarmik oqalunnerisa ilumuunnginnera partiitullu pisariaqartinneqarnerat uppernarsassallugu. Partii Demokraatit tassaavoq toqqaannartumik oqaaseqarnissaminut sapiissuseqartoq aalajangiinernillu pisariaqartunik aalajangiisinnaassuseqartoq. Aamma isumaqarpunga paqumigineqartunik arlalinnik piiaaqataasimallunga, soorlu nunassittarnerup pissusii, pisortani kammalaatersorneq, meeqqanik kinguaassiutitigut atornerluisarneq aammalu qanoq ilioraluarutta piujuaannartitsinissamik tunngaveqartitsisarnissarput.

Palle Christiansenip tunuarneratigut ilisarisimaneqarluartoq Inatsisartunut isissaaq, tassalu Andreas (Anda) Rene Uldum, Demokraatini politikkikkut siulittaasup tulliusoq aammalu 2009-mit 2013-imut Inatsisartunut ilaasortaasimasoq.

- Inatsisartunut iseqqinnissara politikkikkullu sulinissara qilanaarivara, naak maanna pisoq uggornartikkaluarlugu. Inuk imaannaanngitsoq taarsertussaavara, uangali partiimalu anguniagai ilungersuutigalugit sulissaanga. Demokraatit ullumikkut illuatungiliuttutut nukittuumik inissisimapput, kisianni soorunami siunissami politikkikkut amerlanerussuteqarluta naalakkersuisunngortitseqqinnisarput anguniagaraarput, Kalaallit Nunaata imminut napatissinnaanissaa ineriartornermilu pisariaqartumi eqeersimaartumik peqataasinnaanngornissaa qulakkeerniarlugu, Anda Uldum, ullumikkut Kommuneqarfik Sermersuumi borgmesterip tulliatut atorfeqartoq oqarpoq.