Palle Christiansen: " Siumut ammip qalipaataanik assigiinngisitsiniarpoq !"
Demokraatit politikikkut oqaaseqartartuat, inatsisartunut ilaasortaq Palle Christiansen, naalakkersuisut siulittaasuata Qaqortumiit oqaaseqarneranut atatillugu sakkortuumik uparuaavoq.
Siumup partiimi siulittaasuata ilaatigut oqaatigaa – Sermitsiap nittartagaani allassimasut malillugit – Kalaallit Nunaanni namminersulivinnissaq eqqunneqareerpat tunngaviusumik inatsisissamut atatillugu siunnersuutigineqarumaartoq – ”nunanit allanit nunasisut sunik pisinnaatitaaffeqartitaajumaassanersut ” – issuaaneq naavoq.
- Ajuusaarnaraluartumik taamatut oqarluartaarutit qanilliartorpavut, allaanngilaq ammip qalipaataanik immikkoortitsisut aquttuunerisa nalaanni pisimasut, taama oqarpoq, Palle Christiansen, imalu nangippoq:
Isumaqarpunga taamatut oqariartuuteqassalluni massakkut naleqqutinngilluaasartoq, tassami Namminersorneq pillugu ataatsimiititaliarsuaq isumaliuutersuutiminik septembarimi tunniussisussaavoq. Isumaliuutersuullu inatsisartunut tunniunneqareerpat inatsisartuni oqaluserisussaavarput namminersulivinnissamut atatillugu suliniutissat qanoq ingerlanneqarumaassanersut.
Massakkullu tunngaviusumik inatsisissamik oqalussalluni eqqarsaasersorneq Demokraatit tungaaniit isumaqarpunga taamatut oqalussalluni massakkut piffissaanngitsoq.
- Radioaviisimiit apeqqutigineqarmat naalakkersuisut siulittaasuata tunngaviusumik inatsisissamut atatillugu oqarmat, kikkut Kalaallit Nunaanni najugaqartussaanerannik apeqqusiinera tamanna qanoq isumaqarfigaajuk ?
Imalu, Palle Christianseni nangippoq;
- Isumaqarpunga taamatut immikkoortitsisumik tunngaviusumik inatsimmut oqaasertaliisoqartariaqanngitsoq, uangalu nammineq isumaqarpunga Siumukkut ammip qalipaataanik immikkoortitsiniartutut ingerlatsinissamik nipilimmik oqariartuuteqalersut.
Kiisalu tunngaviusumik inatsimmut ilanngunneqassappata kikkut Nunatsinni najugaqassanersut kikkullu pisinnaatitaaffeqartitaassanersut, taava Siumukkut allatut assersuussinnaanngilakka alloriarneq siulleq atorlugu ammip qalipaataanik immikkoortitsinialersutut isigisariaqarakkit.
Demokraatit politikikkut oqaaseqartartuat, Palle Christiansen Radioaviisimi sulisumut Peter Damborgimut taama oqarpoq.
Aamma oqaatigisariaqassavarput naalakkersuisut siulittaasuat Hans Enoksen tunngaviusumik inatsisissamut atatillugu oqalugiarnermini aamma isumaqarmat, aaliangersarneqartariaqartoq, kina kikkullu Kalaallit Nunaanni najugaqartussaatitaassanersut, tamatuma saniatigut nunamik piginnittussaaneq Nunatsinnut utertinneqartariaqarpoq, soorlutaaq Nunarput namminerisaminik Nunanut allanut tunngatillugu politikeqartariaqartoq.
