Palle Christiansen Folketingemut qinigaanngilaq
Naalakkersuisuusimasoq Demokraatinullu ilaasortaasimasoq, Palle Christiansen Folketingimut qinersinissamut talerperliit Liberal Alliancit sinnerlugit qineqqusaartoq folketingimut isernissamut iluatsitsinngilaq.
Palle Christiansen katillugit 211-nit taaneqarpoq, tamannalu naammassimanngitsoq suleqatitta.
Tassami Liberal Alliancep isertitaasa aqqaneq marluk akornanni qinigaaqataanissamut Palle Christiansenip qinersisai 500-ut sinnerlugit amerlanerusussaagaluarput.
- Sjællandip avannaaniit ilaasortaatanngussagaluaruma taasinernik amerlasuunik assigiinngippallaarput, naammassimanngillalli, Palle Christiansen KNR-mut taama oqarpoq.
Qineqqusaarneq allaanerusoq
Taassumalu oqaluttuaraa ukiuni 2002-miit 2013-nip tungaanut Kalaallit Nunaanni qineqqusaarnernut peqataasarnerminiit maannakkut qineqqusaarneq allaanerusimaqisoq.
- Nuanneqaaq misigalugu, qineqqusaarnerit nuannarilluinnarpakka. Kalaallit Nunaanniilli allaaneroqaaq, Kalallit Nunaannimi piffissara tamaat atorsinnaallugu qineqqusaartarnikuuvunga, maannalu tandlægetut sapaatip akunneranut tiimit 35-it sulinerma saniatigut sulinngiffinni qineqqusaartarlunga, Palle Christiansen KNR-mut taama oqarpoq.
Taanna Allerød Kommunimi sassarpoq, taakanilu nuliani meeqqanilu pingasut peqatigalugit angerlarsimaffeqarluni.
Ilimagisaatut inerneqartoq
2000-kut aallartilaartut Palle Christiansenip Demokraatit partiitut nutaatut pilerseqataaffigaa, Inatsisartunilu 2002-miit 2013-ip tungaanut ilaasortaalluni. Taassuma piffissap ingerlanerata kingullermi ukiuni sisamani naalakkersuisuusimavoq, siullermik aningaasaqarnermut naalakkersuisutut, kingornalu Ilinniartitaanermut, ilisimatusarnermut nunallu avannarliit suleqatigiinneranut Kleistip naalakkersuisuutitaqarnerata nalaani naalakkersuisuulluni.
Kalaaleq affarmik danskiusoq Palle Christiansen ukiuni aqqaneq marlunni Kalaallit Nunaani najugaqareerluni Danmarkimut nuuppoq.
Kalaallit Nunaannilu qineqqusaarneq malinnaaffigilluarsimavaa, inerneralu ilimagineqartutut naammassivoq:
- Inernera tupaallannanngilaq, aappaa ataqqisorujussuuaara sulianilu ajunngitsumik ingerlatissagai qularinngilluinnarpara, aappaalu ataqqinngilluinnarpara isumaqarpungalu Kalaallit Nunannut nuanniitsorujussuussasoq, tassanilu ajortuinnaat isiginiarneqassammata, tamannali aallaqqunneqarsinnaanngilaq, Palle Christiansen oqarpoq.
