Palle Christiansen: Inuuniarneq pitsaanerulissaaq
Kalaallit Nunaat sutigut tamatigut imminut nappattoq pilersinneqassappat meeqqat inuusuttullu inuuniarnikkut atugaat pitsanngortinneqartariaqarput. Ilinniakkamik naammassinnissimasut amerlanerulertariaqarput. Inuussutissarsiornermi pissutsit aaqqissuuteqqittariaqarput, taamaalilluni inuussutissarsiutini tapiissutinit attanneqartuni sulisuusut inuussutissarsiutinut tapiissutitaqanngitsunut siunissami nuutsikkiartuaarneqarnissaat siunnerfiulersillugu.
- Meeqqat inuusuttullu inuuniarnermikkut ilinniartitaanikkullu atugaasa tunngaviusumik pitsanngorsaavigineqarnissaat siunnerfilersorluta anguniagaraarput. Taamaalioruttami ineriartoqqinnissatsinnut tunngavissagut aatsaat qularnaarsinnaassavagut, Palle Christiansen oqarpoq.
Naalakkersuisut aningaasaqarnikkut ingerlatsineq pillugu nalunaarutaat 2010 Inatsisartut upernaarmanna ataatsimiinnertik apriilimi aallartippassuk i oqallisigineqartussaavoq.
- Kalaallit Nunaanni inuuniarnikkut atukkat siunissamissaaq pitsaasuuginnarnissaat qulakkeerniarlugu Naalakkersuisut allatut ajornartumik nunatta karsiata aningaasaataanik sukannersumik aqutsisariaqarput, nangippoq.
Aatsaat taamak amerlatigisunik, tassa 1 milliard koruunit missaanni, siorna nunatta karsia amigartooruteqarneq qiviaannarneqarsinnaavoq. Ilassutitut aningaasaliissutinut 700 milliioner koruunit atorneqarput, taamaalilluni amigartoorutissatut 300 millioner koruuninik 2009-mi missingersuusiorsimanerigaluaq sipporujussuarneqarluni.
Royal Greenlandimut pilertortumik immikkut ittumik 500 million koruuninik aasaq kingulleq aningaasaliisariaqarneq taama 2009-mi amerlatigisunik amigartooruteqarsimanermut peqqutaasut annerpaartaraat.
Naalakkersuisut nalunaarusiaminnissaaq naqissuserpaat 2004-miit 2008-p tungaanut aningaasarsiornikkut pitsaasumik ingerlasimaneq ilaatigoortumik aningaasanik attartornernik aningaasalersorneqarsimammat. Ilanngullugu taaneqarpoq innuttaasut tamakkiisumik akiitsui 2005-imiit 2009-p tungaanut marloriaammik amerleriarsimammata, akiitsorilikkat amerlanerit inissianik pisiniarluni aningaasanik attartortitsisartunit pissarsiarineqarsimallutik.
- Nuannaarutissaavorli ilinniakkamik aallartitsisartut ukiuni kingullerni amerliartuinnavissimammata. Taamaalilluni 2005-imiilli ilinnialersimasut 600-nik amerlanerulersimapput, Palle Christiansen naggasiivoq.