Palle Christiansen: Inissiat pillugit politikki nutartertariaqarpoq

Utaqqiisigalugu inigisanik nalilersuinermut tunngatillugu nalunaarusiaq suli naammassinngilaq.

Aningaasaqarnermut naalakkersuisoq, Palle Christiansen, taama ilisimatitsivoq - naak nalunaarusiaq sapaatip akunnerata siuliani naammassissasoq neriorsuutigereeraluarlugu.

Sunarpiarmita pissutaava?

- Naluara, nalunaarusiarlu aggiuppassuk apeqqut taannarpiaq uanga aamma apeqqutiginiarpara, Palle Christiansen oqarpoq. Neriorsuutigaali:

- Piariiliivippoq. Nalunaarusiamik suliarinnittut septembarip naalernerani nalilersuisussaapput, aamma suliarineqareerpoq, sapaatip akunnera kingulleq nukingisaarutigaara. Naatsorsuutigaara maaniinninni suli tigussallugu, tassami Nunat Avannarliit Siunnersuisoqatigiiffiata Islandimi ataatsimiinnissaanut peqataajartortussaavunga.

Inerniliinerilli ilaat oqaatigisinnaavai:

- Ilisimasara unaavoq, utaqqiisigalugu inigisat qanoq pisariaqartinneqartiginerat saqqummersussaavoq, inissiat pillugit politikki allanngortinngikkutsigu, tamanna ukiorpassuit allanngornavianngilaq. Utaqqiisigalugu inissat ukiumut 100-t missaat Nuummiinnaq pisariaqartittussaavavut. Utaqqiisigalugu inissiat maanna piusut sulisut inigisaattut atuutitilinngikkutsigik, politikki allanngornavianngilaq.

Taamaammat Naalakkersuisut assigiinngitsunik periarfissarsiorput:

- Naalakkersuisuni tamanna aalajangiiffiginagajalerparput - suniartugununa? Soorlu Qinngutsinni inissiat sanaartorneqartut sulisut inissiaatut immaqa atorneqarsinnaasut.

Aamma imaaliortoqarsinnaavoq, inissiat attartukkat sulisunit inigineqartut attartortuniit piginnittunut aaqqissuussineq atorlugu pisiarineqarsinnaalllutik. Taamaalilluta aamma nunatta karsianut utertitsisinnaanngussagaluarpugut. Taamaalilluta nutaanik sanaartorsinnaalissagaluarpugut.

Sulisut inigisaat pillugit Palle Christiansen aamma isummersorpoq:

Namminersorlutik Oqartussani sulisut inissiartaarnissartik namminneq aamma isumagisinnaassagaluarpaat:

- Namminersorlutik Oqartussat sulisuminnut inissianik 1.200-nik pissarsisarnissaat uanga ingasagaara. Nunarsuarmi allamiikkaanni, suliartorlunilu nuukkaanni, nammineq inissarsiortarput. Tamanna Kalaallit Nunaanni aamma anginiartariaqarparput.

Utaqqiisigalugu inissiat pillugit suliaq nalilersussagutsigu, pissusissamisut ingerlasimasoq oqarsinnaanerpugut?

- Allanngortittariaqarsimagatsigu oqarsinnaanngilavut taamaattoq,

Palle Christiansen naggasiivoq.