Palle Christiansen: Attartortitsinera nunatta karsiata akilersunngilaa

Siumup aningaasanut naalakkersuisuutitarigallagaata Per Berthelsenip Sisimiuni pinerlussimasunut inissiisarfik qineqqusaarnermut ilannguppaa, pasilliutigalugu Palle Christiansenip init pigisani aningaasarsiutigerujussuarlugit attartortikkai.
Allattoq Mads Lynge
juunip 02-at 2009 07:45

- Ingerlatsiviutiga Nunatta Karsianit 1 koruunimilluunniit pissarsisimanngilaq - Demokraatit siulittaasuata tullia Palle Christiansen oqarpoq. Sermitsiap nittartagaani tamanna atuarneqarsinnaavoq.

- Sooq tamakku tusagassiuutinit misissorneqanngillat, tusagassiuutimmi ilisimasariaqarpaat pisortat aningaasaataannik amerlasuunik taamaalilluni isertitsisarmat, Per Berthelsen emailikkut Sermitsiamut allappoq.

- Kialuunniit nalunngilaa anstaltip attartugaa uanga pigigakku, nutaajunngilarlu naalagaaffimmut attartortinneqarmat, Palle Christiansen oqarpoq.

- Illu pigineqarpoq ingerlatsiviutinnit Sisimiut Dental & Trading ApS, tassalu naatsorsuutit kukkunersiuisartumit kukkunersiorneqartarput ukiumoortumillu naatsorsuutit Erhvervs- og Selskabsstyrelsimut nassiunneqartarlutik.

Per Berthelsenilli Palle Christiansenip taama ingerlatsinera kommunimi Inatsiartunilu ilaasortaaneranut naapertuutinnginnerarpaa.

- Soqutigisanik imminnut assortuuttoqanngilaq, tassami ingerlatsivik kalaallimit pigineqartoq naalagaaffimmut toqqaannartumik isumaqatigiissuteqarmat, Palle Christiansen Sermitsiamut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq