Palæstinamiut akersuuteqqilerput
Kangiani qiterlermi Gaza-mi ukiormanna eqqissiviilliornernik aatsaat taama sakkortutigisunik pisoqarpoq.
Pisortani atorfillit eqqissiviilliuutigaat namminersorlutik ingerlatsisut qaammatini qulingiluani akissarsiassaqartissimanngimmatik.
Ullut pingajussaat palæstinami eqqissiviilliortoqarpoq. Eqqissiviilliorneq ippassaq inuit arfineq-pingasut inuunerannik akeqarpoq inuillu 100-ngajaat ikilerneqarlutik, pisortani atorfillit qaammaterpassuarni akissarsitinneqarsimannginnertik naammagittaalliutigalugu ingerlaaqatigiimmata.
Nunap sakkutuuisa akerliussutsimik takutitsisut unitsinniaraluarpaat taamaalimmallu akersuunnerit eqqaassinertallit aallartinneqarput, naalakkersuisut illuutaat, atuarfiit napparsimmaviillu ikuallatsinneqarlutik.
Hamas-ikkut Israeli naalagaaffittut akueriumanngilaat angorusutamillu anguniarneranni nakuuserneq atorlugu sorsuuteqarusullutik.
Tamanna pissutigalugu EU-p, Amerikap Israelillu aningaasatigut ikiuutigisartakkatik unitsissimavaat, avataaniillu aningaasatigut ikiorneqanngikkunik Palæstinamiut pisortani sulisutik aningaasarsitissinnaanngilaat.
Ullumikkut palæstinami eqqissiviilliornerit killilersimaarniarlugit, pisortat suliffeqarfiutaat matoqqatinneqarput.
Taamaattorli ajornartorsiutip qiterisaa aaqqiivigineqartinnagu nutaanik akerliussutsinik takutitsisoqarnissaa eqqissiviilliortoqaqqilernissaalu ilimagineqarpoq.