Pakistanimut ikiuerusuleriartorput

Aammami ikiorneqarnissaq pisariaqartinneqaqaaq.

Ilaatigut meeqqat millionilikkaat nappaatinik tunillaassuuttunik soorlu timminnermik koleramillu tunillanneqariaannaapput. Nappaatillu tamakkua ajunaarnersuaqartillugu meerarpassuarnit toqqutaasarput.

Taamaattorli aningaasanik ikiuinermi atorneqartussanik katersinerup saniatigut ikiorsiissutigineqartussat ikiortarialinnut apuunneqarnissaat aamma pisariaqarpoq. Tamanna unammillernartuusoq Folkekirkens Nødhjælpimeersut oqaatigaat.

Folkekirkens Nødhjælpimeersut Pakistanip avannaata kippasinnerusuani Svatip Qooruanut ippassaq pigamik, takusatik tupaallaatigeqaat, tassami suut tamarmik sequmissimammata.

Aseruatiternerillu pissutigalugit ikiorsiissutissat apuunniarnerat ajornakusooqaaq.

Ilaatigut ikaartarfiit tamaaniittut tamarmik sequmissimammata, ikiorsiiniartut ingerlariaqqissinnaajunnaartarput.

Sumiiffiit ilaanni ilungersuanaraluaqisoq kuussuit umiatsiamik ikaarneqarsinnaasarput ilaatigullu kuuit qulaatungaasigut inuit ikiorsiissutissallu koorinut ikillugit allunaasamik ninginneqarsinnaasarlutik.

Kisianni umiatsiaatillit kuussuakkut ikaarussiniaraangamik akiliisitsisarput, inuillu ikittuinnaat tamatumunnga akissaqartut oqaatigineqarpoq.

Ilaatigulli ikiorsiissutissat Svatip Qooruanut apuunneqarsinnaasartut, Folkekirkens Nødhjælpimeersut oqaatigaat.

Naalagaaffiit Peqatigiit oqaatigaat arnat, angutit meeqqallu 100.000-ilikkaat ikiorserneqarsimasut, taamaattorli ikiorneqarnissaminnik pisariaqartitsisut 8 millionit angullugit amerlassuseqarmata, tamanna ajornartorsiutaasoq.

Naalagaaffiit Peqatigiit immikkut ittumik New Yorkimi aqagu ataatsimiissapput, nunallu tamalaat Pakistanimi ikiortariaqartunik ikiueqqullugit qinnuigineqaqqinniarput.