Pakistanimi ulersuarneq inuit 1400-t ajunaarutigaat
Inuit 1400-t inuunerannik naleqarluni, ikinnerpaamillu inuit 3 millionit eqqorneqarlutik, taama FN-ip ikiuiniaqatigiiffia Unicef nalunaaruteqarpoq.
Ulersuarnerup sapaatip akunnerata matuma siornali aallartittup ulluni aggersuni sialussuartussaanerani ingatsikkiartuinnarnissaa naattorsuutigineqarpoq.
Ilutigitillugulu annilaanngatigineqarpoq ulersuarnerup kingunerisaanik nappaalanerit ajunaarnerillu annerusut atuutilernissaat.
Suna tamarmi tasiummat masallunilu inuit 100.000-it, taakkunani amerlanerpaat meeqqat nappaalanermik eqqugaapput.
Nasserinerit taassumalu kingunerisaanik imermik amigaateqarnerit, timikkullu naasoornerit naalliuutaapput.
Pakistanimi oqartussaasut sakkutuunik ikiuukkiartortitsipput, taakkuli ilungersuanerat naammanngilaq.
Islamimik upperisallit Talibanimullu attuumassuteqassangatinneqartut nerisassanik atortussanillu agguaasuupput. Taakku naalagaaffiup Islamabadip ilungersunartorsiornera atornerluppaat ikiuunnermikkut innuttaasut imminnut saatsinniarsarigamikkit.
