Pakistanimi Talibanit tunuarsimaaqquneqalerput

Pakistanip avannamut kitaani Swatip qoororsuani akersuunnerit sapaatip-akunneri pingasut ingerlareerpoq.

- Pikitsitsinianut akersuunneq pilersaarutit malillugit ingerlavoq, Pakistanip sakkutuuini generalmajor Attah Abash nalunaarpoq. Pakistanimi naalakkersuisut sakkutuuisa Talibanit illoqarfimmi Mingorami illoqannginnersami "Toqoraavissuaq"-mik taaneqartartumi sapersippaat.

Illoqannginnersami tassani Talibanit tigusatik niaqueriarlugit, allatullunniit naalliutseriarlugit nivinngartarsimavaat. Swatilli qoororsuani suli Talibaneqarpoq:

- Talibanit suli 1.000-it 1.500-illu akornanniittut amigaatigaavut, Pakistanip sakkutooqatigiivini generalmajor Attah Abash nalunaarpoq. Swatip qoororsuani illoqarfiit pingaarnersaanni Mingorami qanitaanilu Talibanit ajugaaffigisinnaagaluarlugit, naalagaaffiup sakkutooqatigiivisa akiukkatik tamakkersinnaasunganngilaat.

Tusakkat kingulliit naapertorlugit Talibanit sakkutuui qimaasunut akuliullutik qimaasunut inissianiilersimapput, qimaasullu sunnersinnaalersimallugit.

USA-mi aviisersuarmi Washington Postimi allaaserineqarpoq ikiuiniaqatigiiffiit naammattumik qimaasunik ikiuisinnaannginnerat iluaqutsiullugu ingasaassiniat ikiuiniaqatigiiffiiniit qimaasut ikiorneqalersimasut. Qimaasut naalakkersuisuimik naammattumik iliuuseqannginnerat kamaatigaat.

- Sorsuffimmit qimaatitaanitta nalaani præsidenterput ilorrisimaaqaluni USA-mi tikeraartuataarpoq, qimaasut ilaat kamassimaqisoq oqarpoq.

Pakistanimi naalakkersuisut qimaasunut atugassarititaasut ilisimagaluarpai. Maannami naalagaaffik Pakistan 1947-mi namminersortunngormalli qimaasunik aatsaat taama amerlatigisunik kingumut ajornartorsiuteqaqqilerpoq.

Swatip qoororsuani pikitsitsisut Talibanit siuttuata Maulana Fazlullahp illoqarfimmi Mingorami eqqaanilu sakkutuuni akiuuttut, inuinnaat asattuuteqqullugit akiuunnitik maannakkorpiaq taamaateqquai.