Pakistanimi qarsutsinersuarmi maannamut 1600-rujut ajunaarput

Pitsaanerungaassagaluarpoq imersuarmi toqussagutta, maannakkummi inuunerput erloqinarnerungaarpoq. Manzur Ahmed nunap immikkoortuata Sindip kujataani aammattaaq qarsutsinermit nalaanneqartumit nunaqarfeeqqamit Zikapurimeersoq taama nalorninartorsiortigaaq.

Silarluttuaannarneranit kuussuaq Indus qarsutsilerpoq, nunap avannaata kangiani sapaatit akunnerisa marluk matuma siornagut qarsutsilerfimmiit ungasissorujussuarmi.

Manna tikillugu inuit 1.600-it sinneqartut ajunaarput, 2 millionit qimaallutik, Pakistanimiullu 14 millioningajaat ajunaarnersuarmit nalaanneqarlutik.

Pakistanimi naalakkersuisut pisortaata oqarnera naapertorlugu tamanna Pakistanip oqaluttuarisaanerani ajornerpaajuvoq. Inuit 14 millionit katillutik pinngortitami ajunaarnersuarni kingullerni pisuni, tassalu 2004-mi malissuaqarnerani, ukiullu tulliani Kazhmirimi nunap sajunnerani, kingullermillu Haitimi nunap sajunnerani nalaanneqartunit amerlanerupput. Ajunaarnersuarni taakkunani pingasuni inuit 11 millionit nalaanneqarput.

Sanilliussinermi Naalagaaffiit Peqatigiit suliaani Pakistanimi ajunaarnersuup qanoq ingasatsiginera ersersinniarneqarpoq. Inuit 600.000-it Swat-ip qooruani uniinnarsimapput, ikiorsiissutissanillu pajugutit anngutitinnissaat ajornavilluni. Qimuttuarsuit allaat atorlugit maannakkorpiaq aqquserngit aserorneqarsimasut ikaartarfiillu nakkaassimasut ingerlaviginiarneqarput. Helikopterit sila taama ajortigitillugu timmisinnaanngillat.