Pakistanimi qaartartumeerisoqaqqippoq
Pakistanimi illoqarfimmi Lahoremi, imminnut ataqatigiissunik marloriarluni, imminut pilliutigaluni ullumi qaartartumeerisoqarnerani ikinnerpaamik 45-t toqutaapput.
Allattoq Elisa Isaksen
marsip 13-at 2010 07:58
Imminut pilliutigalutik qaartartumeerisut marluusut pisuinnarlutik ingerlatillutik Lahoremi sumiiffinni assigiinngitsuni marlunni ataatsikkut qaartartumeeripput.
Qaartartumeerinermi sakkutuut qamussui eqqoriarneqarput toqutaasunilu 45-uusuni qulingiluat sakkutuujupput. Qaartartumeerineq ukiormanna sakkortunerpaatut oqaatigineqarpoq, ikiligaasullu 100-t missiliorpaat.
Ullumi kingusinnerusukkut Lahoremi politeeqarfiup eqqaani pingajussaanik qaartartumeerisoqarpoq, tamatumuunali toqutaasoqarani sisamanik ikiligaasoqartoq politiinit oqaatigineqarpoq.
Pakistanimi sapaatip akunnerani matumaniinnaq imminut pilliutigaluni tallimariarluni qaartartumeerisoqarpoq.
