Pakistanimi ministeriunermut qineqqusaartut
Pakistanimi politikerit qinersisartullu qinersinissamut ataatsimiisitsinernut nalinginnaasunut peqataajumannginnerat peqqutaalluni radiukkut tv-kkullu ussassaarutit pisarnermisut amerlanerusimapput. Benazir Bhuttomik toqutsineq qineqqusaarnermut annertuumik innarliisimavoq. Mianersorluinnartumik pissuseqarneq sumi tamani atugaavoq
Ataasinngornermi qinersisoqalerpat nunap ilaani eqqissiviilliorfiunerusuni taasiartortoqanngitsoornissaa ernummassutigineqarpoq. Ullut marluk-pingasullu allortarlugit imminuujutigaluni qaartartumeerinerit qaartartullu atorlugit saassussinerit tamanna kinguneraat, nunallu immikkoortui tamarmik eqqugaasimasut nutaarsiassaqartitsivinni aaqqissuisut”d´Avorraahn”-imut oqarput. Afghanistanimut killeqarfik eqqugaanerpaasimavoq, tassani politikerit arlallit inini isumannaallisakkani immikkut qaaqqusanut isertortumik qinequsaartarput. Qinigassanngortittulli qaqugu sukkullu takkunnisartik oqatigiumaneq ajorpaat. Pissutsit tamakku peqqutaaqataallutik taasiartortut procentiat pisarnermisut appasinnerussasoq ilimagineqartoq ” d´Avorraahn”-imi oqaatigineqarpoq.
Plakaatit qineqqusaarutit amerlagisassaanngillat ingerlaaqatigiinnerillu akuttullutik. Pingaartumik islamisiortunut ingasaassinianut akerliusut qinersisartunik assamminnissartik tunuarsimaarfigisarpaat. Pakistanimi qinersisartut taasiartornissamut sapiissuseqarnertik ataasinngorpat ulloq qinersivimmi takutittussanngorpaat. Unnuap qeqqaniit aneqqusaajunnaartoqalerpat qineqqusaarnermut piffissaliussaq suliluunniit iluamik aallartinnani naammassissaaq, tamannalu amerlasuut iluariinnarpaat.
