Pakistanimi inatsisilerituut akerliussutsimik takutitsipput
Akerliussutsimik takutitsisut, atisareqisut qilerniusallit, akerliussutsimik takutitsisartunit allanit allaaneroqaat. Tassaaku Pakistanimi inatsisilerituut, tusindit missaaniittut, præsident Musharrafimut naaggaartorlutik nunap sakkortuumik naalakkersorneqalerneranut akerliussutsimik takutitsisut. Atisarissaarneq qilerniusaqarnerluunniit sakkutuut sakkortusaarnissaannut akornutaanngilaq, arfininngormallimi aamma politikkikkut præsidentimut akerliusut inatsisilerituullu arlalinnik untritillit paarnaarussaasimapput. Pakistan nunanit allanit isorineqaraluttuinnarpoq, Hollandip ineriartornissamut ikiuutigisartakkani aningaasat unitsippai, USA-llu præsidentiata ippassaq unnukkut præsident Musharraf isornartorsiorpaa, piaartumillu qinersisoqarnissaa naatsorsuutiginerarlugu, præsidentillu sakkutuutut atisani ateqqinniarnagit neriorsuereermat peeqqullugit kaammattorpaa. Musharrafillumi aamma demokratii malillugu naalakkersuisoqalernissaa neriorsuutigereernikuuaa, ippassarlumi oqarpoq pilersaarutit malillugit qinersisoqassasoq. Naalakkersuisoqatigiit ajornartoorsimaneq pillugu ullumi ataatsimiittussat ilumut qinersisoqassamaarnersoq immaqa nalunaarutigissavaat.
