Pakistanimi Bhuttop partiia qinersinermi peqataaniarpoq

Qinersinermik mattussinissaq oqallisaaqaaq.

Maannali Pakistanimi inatsisartunut qinersinissaq Bhuttogaluup partiianit PPP-mit mattunniarneqanngilaq.

Tamanna partiip siuttuinit nutaanit, tassaasunit Bhuttogaluup erneranit nuleerneranillu, tusagassiuutinik katersuutsitsinermi erseqqissarneqarpoq.

Taamaalilluni partii illuatungiliuttoq pingaarutilik alla Pakistans Muslimske Liga-N, Nawas Sharif-imit siuttuuffigineqartoq qinersinermi aamma peqataassaaq.

Partiip taassuma peqataanissaminut partiip PPP-p peqataanissaa aalajangiisuutippaa.

- PPP qinersinermi peqataaniarpat aamma uagut peqataassaagut, partiip siuttuisa ilaat qanittukkut AP-mut oqarpoq.

Qinersinissalli januaarip arfineq-pingajuanni pinissaa nalunarallarpoq. Partiip naalakkersuisuutitaqartup oqaaseqartitaa naapertorlugu qinersinissaq qaammatinik pingasunik sisamanilluunniit kinguartinneqarsinnaavoq.

Illuatungiliuttut partiivisa angisuut marluk peqataanissaat qinersinerup uppernassusaanut demokratiilu malillugu ingerlanneqarneranut apeqqutaasorujussuussaaq.

Qinersineq iluatsittumik ingerlanneqarpat Pakistanimi inuinnaat oqartussaaqataanerat eqqunneqassagaluarpoq, sakkutuullu kisermaassillutik naalakkersuinerat 1999-imi aammik kuisinertaqanngitsumik eqqunneqartoq, præsident Pervez Musharraf-imit siuttuuffigineqartoq qaangiutissagaluarluni.

PPP-p siulittaasorigalua Benazir Bhutto, decembarip 27-anni qineqqusaartoqareersorlu toqunneqarpoq.