Pajuttaat Ikerasammut tikinngitsoorpoq

Pajuttaat Uummannap eqqaanut Ikerasammut ukioq manna naggataamik tikittussaagaluaq sikuunera pillugu utiinnarpoq. Juullertinnagu pajuttoqanngippat nunaqarfimmiut eqqugaassapput. - Umiarsuarmik anginermik juullertinnagu tikittoqarnissaa kissaatigaarput, Ikerasammi nunaqarfimmi aqutsisut siulittaasuat Jens Kristian Therkildsen oqarpoq.
Allattoq Oline I. Olsen
decembarip 11-at 2009 15:28

Royal Greenlandip tunitsivia aalisartut 60-70-it missaaniittut qaleralinnik tunitsivigisarpaat. Tunitsiviup qerititsivia qaleralinnut 17 tonsinut suli inissaqartoq, Royal Greenlandimit oqaatigineqarpoq.

Pajuttaalli tikinngippat qalerallit nassiunneqarsinnaanngillat, qerititsivillu ulikkaarpat tunitsivik matuneqassaaq.

Ikerasammiut juullimut piareersarnerat aamma killeqalersinnaavoq. Pilersuisoq suli nioqqutissaateqartoq juullertinnagu nioqqutissaarussinnaavoq.

- Soorlu pannikaassiat, sukkut juullimut kaagiliornermi atorneqartartut nugussinnaasut niuertumit oqaatigineqarpoq, Jens Kristian Therkildsen oqarpoq. Ikerasammiut suli periarfissaqarunarput.

Pajuttaat maanna Uummannamut aallartoq, Ikerasammut pajunniarumaarpoq. Tassami siku ajunngippat Ikerasaap eqqaani sikup sinaani Pajuttaat usigiassaaq usilersorlunilu. Tamannali iluatsissanersoq Pajuttaami aquttup nalilersorumaaraa, Royal Arctic Linemit nalunaarutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq